انڈین پریمئیر لیگ کے بخار کا جادو بھارتیوں پر سر چڑھ کر بول رہا ہے، شائقین کے لئے مشکل ہو گیا ہے کہ وہ معمولات زندگی اور کرکٹ میں کس پر توجہ دیں۔

بھارت میں کرکٹ کا جنون اس وقت اپنے جوبن پر ہے کیونکہ انڈین پریمئیر لیگ سیزن 15 کے میچز جاری ہیں، شائقین کرکٹ اپنی اپنی فرنچائز کو سپورٹ کرنے کے لئے گراؤنڈ پہنچ رہے ہیں۔

گراؤنڈ میں شائقین مختلف طریقوں سے خود کو منفرد بنانے کی کوشش کرتے رہتے ہیں ، کچھ لوگ رقص کرتے ہیں تو کچھ شائقین پلے کارڈز کا سہارا لیتے ہیں۔

اسی تناظر میں آج انڈین پریمئیر لیگ میں سن رائزرز حیدرآباد اور کولکتہ نائٹ رائیڈرز کے مابین جاری میچ میں شائقین کی ایک ایسی تصویر سوشل میڈیا پر وائرل ہو رہی ہے جس میں دو شائقین نے پلے کارڈز ہاتھوں میں اٹھا رکھے ہیں۔

ایک شائق نے پلے کارڈ پر لکھا تھا کہ میں سن رائزرز حیدرآباد کو سپورٹ کرنے آیا تھا، مگر سوہانا نے مجھے کنفیوز کر دیا ہے، واضح رہے کہ سوہانا بالی ووڈ کے کنگ شاہ رخ خان کی بیٹی ہے۔

دوسرے شائقین کے پلے کارڈ پر لکھا تھا کہ میری گرل فرینڈ نے خود اور آئی پی ایل میں سے کسی ایک کو منتخب کرنے کا کہا اور میں اسٹیڈیم آ گیا۔

کولکتہ نائٹ رائیڈرز نے اس میچ میں پہلے بیٹنگ کرتے ہوئے مقررہ 20 اوورز میں 8 وکٹوں پر 175 رنز بنائے ہیں ، جواب میں سن رائزرز حیدرآباد کی ٹیم کی بیٹنگ جاری ہے۔