پاکستان نے سابق گزشتہ دور حکومت میں وزیراعظم ہاؤس سے متعلق من گھڑت خبر چھاپنے پر بی بی سی سے جواب طلب کرلیا ہے۔

برطانوی نشریاتی ادارے (بی بی سی) اُردو کی وزیراعظم ہاؤس سے متعلق من گھڑت، بے بنیاد اور جھُوٹی کہانی کے معاملے میں پاکستان نے جواب طلب کرلیا۔

 پاکستان کی جانب سے تحریری شکایت ڈائریکٹر جنرل بی بی سی کو موصول ہوگئی اور انہوں نے اس کی تصدیق بھی کردی ہے جب کہ بی سی سی نے پاکستان کی شکایت پر معاملے کا جائزہ لینا شرو ع کر دیا ہے۔

خیال رہے کہ 10 اپریل کو بی بی سی اردو کی جانب سے ایک بے بنیاد اسٹوری شائع کی گئی تھی جس میں تمام باتیں حقائق اور صحافتی اُصولوں کے منافی تھیں۔

یہ بھی پڑھیں: بی بی سی اردو کی  خبر بے بنیاد اور جھوٹ کا پلندہ ہے، آئی ایس پی آر

دوسری جانب پاک فوج کے شعبہ تعلقات عامہ (آئی ایس پی آر) سمیت تمام اسٹیک ہولڈرز اس اسٹوری  کو پہلے ہی رد کرچکے ہیں اور اب پاکستان کی جانب سے باضابطہ طور پر وضاحت بھی طلب کرلی گئی ہے۔

آئی ایس پی آر کی جانب سے جاری بیان میں کہا گیا تھا کہ بی بی سی اردو کی خبر مکمل طور پر بے بنیاد اور جھوٹ کا پلندہ ہے، بی بی سی کی روایتی پروپیگنڈہ خبر میں کئی حقائق نظرانداز کئے گئے۔

یہ بھی پڑھیں: بے بنیاد خبروں پر حکومت پاکستان کا بی بی سی سے باضابطہ احتجاج

واضح رہے یہ پہلی بار نہیں جب بی بی سی اُردو نے اس طرح کی بے بنیاد اسٹوری چھاپی ہو بلکہ وہ  ماضی میں بھی ایسی ہی بے بنیاد اور جھوٹی اسٹوریاں شائع کرتا رہا ہے ، حکومت پاکستان کی جانب سے برطانوی نشریاتی ادارے (بی بی سی) کی 2 جون کی یک طرفہ  اور بے بنیاد خبرپرباضابطہ احتجاج کیا گیا تھا۔