پاکستان تحریک انصاف نے اسلام آباد ہائی کورٹ سے استدعا کی ہے کہ دیگر 17 جماعتوں کی فنڈنگ کا فیصلہ بھی ایک ماہ میں سنایا جائے۔

اسلام آباد ہائی کورٹ میں دائر درخواست میں تحریک انصاف کی جانب سے مؤقف اپنایا گیا کہ الیکشن کمیشن پی ٹی آئی کے خلاف کارروائی کرنے میں جانبداری کا مظاہرہ کررہا ہے۔

پی ٹی آئی کی درخواست میں یہ بھی کہا گیا ہے کہ الیکشن کمیشن پی ٹی آئی اکاؤنٹس کی طرح 17 سیاسی جماعتوں کے اکاؤنٹس کی اسکروٹنی سے انکاری ہے۔ الیکشن کمیشن کے رویے سے پی ٹی آئی متاثرہ پارٹی ہے۔

درخواست میں یہ مؤقف بھی پیش کیا گیا کہ الیکشن کمیشن کو 17 سیاسی جماعتوں کے اکاؤنٹس کی چھان کا حکم دیا جائے۔ الیکشن کمیشن کو حکم دیا جائے کہ اسٹیٹ بنک تمام سیاسی جماعتوں کے اکاؤنٹس کی چھان بین کرے۔

دائردرخواست میں کہا گیا کہ اسٹیٹ بنک کی رپورٹ کے بعد الیکشن کمیشن سیاسی جماعتوں کے اکاؤنٹس کی تفصیلات عام کرے۔ الیکشن کمیشن کو ہدایت کی جائے 17 سیاسی جماعتوں کے کیسز روزانہ کی بنیاد پر سن کر ایک ماہ میں فیصلہ کرے۔

تحریک انصاف نے عدالت سے یہ بھی استدعا کی کہ الیکشن کمیشن کو ہدایت کی جائے پی ٹی آئی کے ساتھ جانبدارانہ رویہ نہ رکھے۔

وکیل انورمنصور خان اور شاہ خاور نے پی ٹی آئی کے رہنما عامر کیانی کی جانب سے درخواست دائر کی۔

تحریک انصاف نے درخواست میں ن لیگ ، پی پی پی ، ایم کیو ایم ، جماعت اسلامی ،عوامی مسلم لیگ، تحریک لبیک کے علاوہ باپ ، بی این پی ،اے این پی ،پی ٹی آئی و دیگر کو فریق بنایا ہے۔

درخواست میں الیکشن کمیشن کے علاوہ 17 سیاسی جماعتوں کو فریق بنایا گیا۔