بھارتی اداکارہ مرونل ٹھاکر نے کہا ہے کہ اب انہیں اب اپنے خوابوں میں بسے رہنے سے کوئی نہیں روک سکتا۔

بالی وُڈ کے مشہور ہیرو شاہد کپور کے ساتھ نئی فلم جرسی میں کام کرنے والی ہیروئن مرونل ٹھاکر نے کہا ہے کہ انہوں نے جو کچھ بھی حاصل کیا وہ اپنے بل بوتے پر کیا، لہٰذا اب مجھے اپنے خوابوں میں بسے رہنے سے کوئی نہیں روک سکے گا۔

اداکارہ شاہد کپور کے ساتھ کی گئی اپنی فلم جرسی کی تشہیر میں مصروف ہیں اور وہ کافی پُرجوش ہیں، اور ان کا کہنا ہے جرسی کافی انتظار کے بعد اب تھیٹرز پر ریلیز ہونے کو ہے۔

واضح رہے کہ فلم جرسی کو اس کی ریلیز کے لیے کافی رکاوٹوں کا سامنا رہا پہلے تو کورونا وائرس کی وجہ سے ریلیز نہ ہوسکی، تاہم اب یہ فلم کچھ عدالتی معاملات میں پھنسی ہے لیکن جلد اس کی ریلیز کی امید ظاہر کی جا رہی ہے۔

میڈیا سے حالیہ گفتگو کے دوران مرونل ٹھاکر نے اپنے ٹیلی ویژن کیریئر سے فلم کی جانب آنے کے حوالے سے بتایا کہ ویسے تو وہ 2014 میں مراٹھی فلم وٹی ڈنڈو میں کام کرچکی ہیں، تاہم بالی ووڈ میں ان کی ہندی فلموں میں سفر کا آغاز 2018 میں لوو سونیا سے ہوا تھا۔

جس کے بعد انہوں نے 2019 میں سپر 30 اور بٹلہ ہاؤس اور 2021 میں فلم دھماکا میں کام کیا۔

اداکارہ  کا کہنا ہے کہ وہ آنجہانی اداکارہ سمیتا پاٹل سے کافی متاثر ہیں اور ان کو اپنا آئیڈیل سمجھتی ہیں، ان کی فلمیں دیکھ کر بڑھی ہوئی انہیں خاص کر ان کی فلم منڈی بہت پسند ہے۔