فیس بک ایپ میں ہونے والی تیکنیکی خامی کے نتیجے میں متعدد استعمال کنندگان کے اکاؤنٹس شرائط و ضوابط کی خلاف ورزیوں پر بند کردیے گئے ہیں۔

غیرملکی خبررساں ادارے کے مطابق گزشتہ روزدنیا بھرمیں فیس بک صارفین نے ایک عجیب مسئلے کا سامنا کیا، صارفین کے اکاؤنٹس ان فیس بک پالیسیوں کی خلاف ورزی پربند کردیے گئے۔ جو کہ ان سے سرزد ہی نہیں ہوئی ہے۔

رپورٹ کے مطابق بہت سے صارفین نے جب اپنی فیس بک ایپ کو کھولا تو انہیں یہ پیغام دکھائی دیا’ آپ کا فیس بک اکاؤنٹ بلاک ہوچکا ہے، کیوں کہ آپ نے ہمارے کمیونٹی معیارات کو فالونہیں کیا ہے اوریہ فیصلہ ناقابل واپسی ہے۔‘

اس بابت فیس بک کی بانی کمپنی میٹا کی ترجمان اینڈی اسٹون کا اپنی ٹوئٹ میں کہنا ہےکہ ’ ہم اس بات سے واقف ہیں کہ کچھ استعمال کنندگان کو اپنے فیس بک اکاؤنٹس تک رسائی میں مسائل کا سامنا ہے اورہم اس مسئلے کوجلد ازجلد حل کرنے کے لیے کام کررہے ہیں۔‘

فیس بک کی جانب سے اکاؤنٹس کی بندش نے دنیا بھر میں صارفین کو تشویش میں مبتلا کردیا، کچھ صارفین ایسے بھی ہیں، جنہوں نے کئی دنوں سے اپنی وال پر کچھ بھی پوسٹ نہیں کیا تھا تاہم کمیونٹی پالیسیوں کی خلاف ورزی پران کے اکاؤنٹس بھی بند کردیے ہیں۔

میٹا کی جانب سے ابھی تک آفیشلی اس بات کا اعلان نہیں کیا گیا ہے کہ اس تیکنیکی خامی سے دنیا بھرمیں کتنے اکاؤنٹس متاثرہوئے ہیں۔ نہ ہی میٹا کی جانب سے اس بات کو واضح کیا گیا ہے کہ متاثرین اپنے اکاؤنٹس تک دوبارہ کب رسائی حاصل کرسکیں گے۔