چینی وزارت خارجہ کے محکمہ اطلاعات کے ترجمان لی جیان ژاؤ کا کہنا ہے کہ اپنی بالادستی اور مفاد کے لیے خود مختار ریاستوں کو دھمکانا امریکی آزادی کی تعریف ہے۔

چینی ترجمان نے ریاستوں کے داخلی معاملات میں مداخلت پر امریکا کوایک مرتبہ پھر تنقید کا نشانہ بنایا ہے۔

لی جیان ژاؤ نے مختلف اخبارات کی ہیڈلائنز شیئر کیں جن میں امریکا نے روس کا ساتھ دینے پر ممالک کو دھمکیاں دی تھیں۔

انہوں نے اپنے ٹوئٹ میں لکھا کہ خودمختار ریاستوں کو امریکی بالادستی کی خلاف ورزی سے دھمکانا ہی  امریکا کے نزدیک آزادی ہے۔

لی جیان ژاؤ کی شیئر کردہ پہلی خبر میں لکھا تھا کہ بائیڈن کو روس کی حمایت پر سعودیہ کو ضرور سزا دینی چاہیے۔

جبکہ دوسری ہیڈلائن میں لکھا تھا کہ چین، روس کے معاون کا کردار ادار نہ کرے، نیٹو کے رہنماؤں کا  انتباہ۔

ایک اور خبر میں بھارت کو بھی دھمکی دی گئی تھی، ہیڈلائن میں لکھا تھا کہ روس پر عائد کردہ پابندیوں کو نظرانداز کرنے پر نتائج بھگتنا ہوں گے، امریکا کا  بھارت کو انتباہ۔

ایک خبر میں لکھا گیا کہ امریکا نے پاکستان کو یوکرین جنگ کے نتائج سے خبردار کردیا۔

جبکہ آخری ہیڈلائن میں لکھا تھا کہ امریکا کی روس سے تیل کی درآمد میں اضافے پر بھارت اور دیگر ممالک کو  تنبیہہ۔

American-style #freedom: The power to warn sovereign states not to defy U.S. hegemony. pic.twitter.com/RtWw0csmZs

Advertisement

— Lijian Zhao 赵立坚 (@zlj517) April 8, 2022

خیال رہے کہ روسی وزارت خارجہ نے بھی رواں ہفتے اپنے بیان میں کہا تھا کہ امریکا نے روس کا دورہ منسوخ نہ کرنے پر پاکستانی وزیراعظم عمران خان کو سزا دی ہے۔

روسی وزارت خارجہ کا اپنے بیان میں کہنا تھا کہ امریکا نے روس کا دورہ منسوخ نہ کرنے پر ’نافرمان‘ عمران خان کو سزا دی۔

صدر عارف علوی کی جانب سے قومی اسمبلی کی تحلیل کا حوالہ دیتے ہوئے روسی وزارت خارجہ نے  مزید کہا تھا کہ جب وزیرِاعظم عمران خان نے فروری میں ماسکو کا دورہ کرنا تھا تو اس وقت امریکا اور اس کے مغربی اتحادی وزیراعظم پر یہ دورہ منسوخ کرنے کے لیے شدید دباؤ ڈال رہے تھے۔ لیکن وہ پھر بھی روس کے دورے پر آئے تو امریکا کے نائب وزیرِ خارجہ برائے جنوبی ایشیا ڈونلڈ لیو نے واشنگٹن میں پاکستانی سفیر کو طلب کر کے دورہ فوری طور پر منسوخ کرنے کے لیے دباؤ ڈالا مگر یہ مطالبہ بھی رد کر دیا گیا۔