خیبرپختونخوا فوڈ سیفٹی اتھارٹی کی جانب سے غیر معیاری بیکریز کے خلاف کریک ڈاؤن کیا گیا ہے۔

تفصیلات کے مطابق کارروائیاں بنوں، مردان اور دیر لوئر میں غیر معیاری بیکریز کے خلاف کی گئیں، متعدد بیکریوں میں صفائی کی صورتحال نہایت ناقص پائی گئی جس کے نتیجے میں تین یونٹس سیل کردئے گئے ہیں۔

فوڈ سیفٹی اتھارٹی حکام نے بتایا کہ بیکری یونٹس سے 500 کلو سے زائد غیر معیاری گھی بھی برآمد کیا گیا بیکری یونٹس سے خراب انڈے، مضر صحت رنگ، اور رنگ کاٹ بھی برآمد کرلیا گیا ہے۔

 فوڈ سیفٹی اتھارٹی حکام نے کہا کہ  مردان اور دیر لوئر میں بھی غیر معیاری پراڈکٹس فروخت کرنے پر دو بیکری یونٹس سیل کردئے گئے ہیں۔

 فوڈ سیفٹی اتھارٹی حکام نے مزید کہا کہ  دیر لوئر میں بیکری یونٹ سے سینکڑوں کلو غیر معیاری مٹھائیاں اور مضر صحت رنگ ضبط کرلیا گیا ہے۔

خیال رہے کہ کچھ روز قبل ہی خیبرپختونخوا فوڈ سیفٹی اتھارٹی کی جانب سے جعلی گڑ تیار کرنے والے یونٹ کے خلاف کی گئی کارروائی کے نتیجے  میں 1400 کلو چینی، خراب گڑ اور مضر رنگ  ضبط کرلیا گیا تھا۔

ڈی جی فوڈ سیفٹی اتھارٹی شاہ رخ علی خان کا کہنا ہے کہ یونٹ میں گنے کے بجائے چینی، خراب گڑ اور مضر صحت رنگوں کی مدد سے گڑ تیار کیا جارہا تھا۔

ڈی جی فوڈ سیفٹی اتھارٹی کے مطابق مارکیٹ میں صاف اور محفوظ خوراک کی فراہمی یقینی بنا رہے ہیں، عوام بھی ملاوٹ مافیا کے خلاف شکایات ہمارے ٹال فری نمبر پر درج کرائیں۔