مسلم لیگ ن کے رہنما احسن اقبال نے کہا ہے کہ عمران نیازی جتنی بھارت کی خارجہ پالیسی کی تعریفوں کے پل باندھ رہے ہیں لگتا ہے کہ وہ بھارتی وزارت خارجہ کے پی آر او ہیں۔

سماجی رابطے کی ویب سائٹ ٹوئٹر پر اپنے جاری کردہ پیغام میں احسن اقبال نے کہا کہ آج عمران خان ایک طرف ہے اور پاکستان کی تمام جمہوری قوتیں دوسری طرف ہیں جنہوں نے 2018 کے انتخابات میں مجموعی طور پہ 70 فیصد ووٹ لئے تھے۔

آج عمران خان ایک طرف ہے اور پاکستان کی تمام جمہوری قوتیں دوسری طرف ہیں جنہوں نے 2018 کے انتخابات میں مجموعی طور پہ 70 فیصد ووٹ لئے تھے- عمران نیازی کے بقول یہ 70 فیصد غدار ہیں وہ اکیلے محب وطن ہیں- جو شخص ایسا دعوی کرے اس کی ذہنی کیفیت کے بارے میں کچھ کہنا فضول ہے-

— Ahsan Iqbal (@betterpakistan) April 9, 2022

انہوں نے ٹوئٹر پیغام میں مزید کہا کہ عمران نیازی کے بقول یہ 70 فیصد غدار ہیں وہ اکیلے محب وطن ہیں، جو شخص ایسا دعوی کرے اس کی ذہنی کیفیت کے بارے میں کچھ کہنا فضول ہے۔

واضح رہے کہ وزیرِ اعظم عمران خان کے خلاف تحریکِ عدم اعتماد کی قرار داد پر ووٹنگ کے لیے قومی اسمبلی کا اجلاس آج ہورہا ہے۔

وزیراعظم عمران خان کی جانب سے آج ہونے والے قومی اسمبلی کے اجلاس میں شرکت نہ کرنے کا امکان ہے۔

اس حوالے سے وزیر خارجہ شاہ محمود قریشی نے میڈیا سے گفتگو کرتے ہوئے کہا کہ ہم نے  آئین کے دائرے میں رہ  کر اپنا موقف  پیش  کریں گے۔

انہوں نے کہا کہ آج قومی اسمبلی میں عمران خان اور پی ٹی آئی کا موقف پیش کروں گا اور تمام صورتحال پر ایوان میں بات کروں گا۔

صحافی نے وزیراعظم کی آمد کے متعلق سوال کیا جس کے جواب میں شاہ محمود قریشی کا کہنا تھا کہ ’ تھوڑا انتظار کیجیے‘۔

قومی اسمبلی کا ہنگامہ خیز اجلاس آج ہورہا ہے جس میں وزیراعظم عمران خان کے خلاف عدم اعتماد کی قرارداد پر ووٹنگ ہوگی۔

اجلاس میں شرکت کے لئے حکموتی اراکان سمیت اپوزیشن کے ارکان کی آمد کا سلسلہ جاری ہے جبکہ اجلاس آج ساڑھے 10 بجے منعقد ہوگا۔

حکومت نے قرارداد پر آج ووٹنگ کروانے اور اپوزیشن نے اس عمل کو مکمل کرنے کےلیے اپنی اپنی حکمت عملی مرتب کرلی ہے جبکہ سیکیورٹی کے بھی غیر معمولی انتظامات کیے گئے ہیں۔

دوسری جانب اپوزیشن کی جانب سے خبردار کیا گیا ہے کہ عدالتی فیصلے کے مطابق عمل کریں، اسمبلی اجلاس میں گڑبڑ توہین عدالت ہوگی۔