کرپٹوکرنسی نے تودنیا کے مالیاتی نظام میں ہلچل پیدا کی تھی، لیکن ڈیجیٹل اثاثوں کی شکل میں ہونے والی نیلامی نان فنجائی ایبل ٹوکنز( این ایف ٹی ) نت نئی مثال قائم کررہی ہے۔

چند ماہ قبل دنیا کا پہلا ایس ایم ایس لاکھوں ڈالرمیں نیلام ہوا تھا اوراب اسی پلیٹ فارم پرمائیکروبلاگنگ ایپ ٹوئٹرکے بانی جیک ڈورسی کی پہلی ٹوئٹ 48 ملین ڈالرمیں نیلام ہوگئی ہے.

یہ بھی پڑھیں: ویزا سروس نے این ایف ٹی تربیتی پروگرام متعارف کردیا

’جسٹ سیٹنگ اپ مائی ٹوئٹ‘ کے عنوان سے مارچ 2006 میں کی گئی جیک ڈورسی کی یہ ٹوئٹ دنیا کی پہلی ٹوئٹ تھی۔

ٹوئٹربانی کی اس تاریخی ٹوئٹ کومارچ 2021 میں ملائیشیا کی بلاک چین سروس’ برج اوریکل سینا استوی‘ کے چیف ایگزیکٹوآفیسرسینا استوی نے 29 لاکھ ڈالرمیں خریدا تھا۔

تاہم این ایف ٹی مارکیٹ پلیس اوپن سی پراس ٹوئٹ کو دوبارہ 48 ملین ڈالرمیں نیلام کردیا گیا ہے۔

مزید پڑھیں: یوکرین نے دنیا کا پہلا این ایف ٹی جنگی میوزیم قائم کردیا

اس نیلامی کو حتمی شکل دینے سے قبل استوی کا اپنی ٹوئٹ میں کہنا تھا کہ ’ میں نے اس این ایف ٹی (دنیا کی پہلی ٹوئٹ) کوفروخت کرنے اورحاصل ہونے والی رقم کا 50 فیصد (تقریبا 25 ملین ڈالر) فلاحی تنظیم ’گیوڈائریکٹلی‘ کو عطیہ کرنے کا فیصلہ کرلیا ہے۔

استوی کی اس ٹوئٹ کے جواب میں جیک ڈورسی نے کہا ہے کہ ’99 فیصد کیوں نہیں ؟‘

https://twitter.com/sinaEstavi/status/1511832413973983239?s=20&t=ZCmcaW9j5jKxyPZasPXwpg

اوپن سی پریہ ٹوئٹ 14 ہزار 969 ایتھریم ( 48 ملین ڈالر) میں نیلام ہوگئی ہے۔

نان فنجائی ایبل ٹوکن کیا ہے؟

کرپٹو کرنسی کے ذریعے ڈیجیٹل اثاثوں کی خریدوفروخت کو نان فنجائی ایبل ٹوکن کی شکل میں پیش کیا جاتا ہے۔ لیکن کاغذ پر بنی کسی شے کی تصویر این ایف ٹی نہیں ہوگی بلکہ وہ ڈیجیٹل تصویر، یوٹیوب کی پہلی ویڈیو، ایپل کا پہلا کوڈ یا پھرسی این این کا پہلا ویب پیچ ہوسکتی ہے۔

سادہ الفاظ میں صرف ڈیجیٹل یا سائبراسپیس میں تیار ہونے والا کوئی شاہکار ہی این ایف ٹی کہلائے گا۔