صدر مملکت نے وفاقی محتسب کو ملک کے دور دراز علاقوں تک اپنی رسائی بڑھانے کی ہدایت کی ہے۔

صدر مملکت سے وفاقی محتسب پاکستان، اعجاز احمد قریشی، کی ملاقات ہوئی ہے جس میں ڈاکٹر عارف علوی نے عام آدمی کو فوری اور مفت انصاف فراہم کرنےکی ضرورت پر زور دیا ہے۔

اس موقع پر صدر مملکت کا کہنا تھا کہ وفاقی محتسب میڈیا کے ذریعے اپنے کردار اور خدمات کے بارے میں آگاہی پیدا کرے۔

 انہوں نے کہا کہ وفاقی محتسب شکایات کے جلد ازالے کیلئے مختلف سرکاری محکموں کے ساتھ روابط قائم کرے اور لوگوں کی شکایات تیزی سے نمٹانے کیلئے سرکاری اداروں کے ساتھ تعاون بڑھائے۔

انہوں نے مزید کہا کہ فضول قانونی چارہ جوئی کی حوصلہ شکنی کی جائے، اس سے محکموں اور وفاقی محتسب پر بوجھ بڑھتا ہے۔

 ان کا کہنا تھا کہ وفاقی محتسب یوٹیلیٹی کمپنیوں کی ناانصافی کےخلاف شکایت کنندگان کو جلد انصاف فراہم کرے اور محکموں کی بدانتظامی کے خلاف شکایات کے فوری ازالے کیلئے جدید آئی ٹی ٹولز استعمال کرے۔

اسکے علاوہ ملاقات میں وفاقی محتسب کی سال 2021 کے دوران ادارے کی کارکردگی اور کامیابیوں کے بارے میں بریفنگ دی گئی اور بتایا گیا کہ گزشتہ سال وفاقی محتسب کو 110,398 شکایات موصول ہوئیں تھیں۔

 بریفنگ کے دوران بتایا گیا کہ کل شکایات میں سے 106,732 حل کی گئی، محتسب کے 92.7 فیصد فیصلوں پر عملدرآمد کیا گیا جبکہ 42,000 آن لائن موصول ہوئیں اور ان پر کارروائی کی گئی ۔

اس دوران صدر مملکت کو ملک کے مختلف علاقوں میں شکایات سیل، علاقائی دفاتر کے قیام پر بھی بریفنگ  دی گئی۔

صدر مملکت نے محتسب کی کارکردگی اور رسائی بڑھانے کی سرگرمیوں کو سراہا اورادارے کو مضبوط بنانے، فوری انصاف کی فراہمی میں تعاون کا یقین دلایا ہے۔