عدالت نے میشا شفیع کی ویڈیو لنک پر جرح کی درخواست خارج کرنے کا فیصلہ جاری کر دیا۔

رپورٹ کے مطابق لاہور کی سیشن عدالت نے ہتک عزت کے دعویٰ میں گلوکارہ میشاء شفیع کی ویڈیو لنک جرح کی درخواست خارج کرنے کا تحریری فیصلہ جاری کر دیا ہے۔

عدالت نے کہا کہ کینیڈا میں پاکستانی ایمبیسی کے اوقات کار اور عدالتی اوقات کار میں فرق کی وجہ سے درخواست خارج کر دی گئی ہے۔

ایڈیشنل سیشن جج خان محمود نے گلوکارہ میشاء شفیع کی درخواست پر 2 صفحات پر مشتمل تحریری فیصلہ جاری کیا۔

عدالت کے مطابق عدالت میشاء شفیع نے 9 سالہ بیٹی کے کورونا میں مبتلا ہونے کے سبب کینیڈا سے ویڈیو لنک پر جرح کی استدعا کی تھی کورونا قرنطینہ کا دورانیہ 14روز ہے جو میشاء کی درخواست دائر کرنے سے شمار کیا جائے تو وہ بھی مکمل ہو چکے ہیں۔

عدالت نے کہا کہ اگر ویڈیو لنک پر جرح کا حکم دیا بھی جائے تو وہ پاکستانی سفارتخانے کے افسر کی موجودگی میں ہی ہو سکتی ہے۔

واضح رہے کہ پاکستان اور کینیڈا کے وقت میں 10 گھنٹے کا فرق ہے، جبکہ ویڈیو لنک کی سہولت کی عدم دستیابی پر ایسی ہدایات نہ دینے کا ہائی کورٹ کا فیصلہ موجود ہے۔

خیال رہے کہ گلوکارہ میشا شفیع نے پاکستانی مشہور گلوکار علی ظفر پر جنسی ہراسانی کا الزام لگایا تھا جس کے بعد سے اب تک یہ معاملہ حل نہیں ہو سکا ہے۔