مری میں سیاحوں کی سہولت کے لیے پنجاب پولیس نے مری ٹورازم پولیس کا آغاز کر دیا ہے۔

تفصیلات کے مطابق آر پی او راولپنڈی اشفاق احمد خان سی پی او راولپنڈی عمر سعید ملک نے لوئر ٹوپہ کے مقام پر مری ٹورازم پولیس کا افتتاح کیا، آر پی او راولپنڈی اشفاق احمد خان کا کہنا تھا کہ شہریوں اور سیاحوں کی حفاظت اور خدمت کے لیے تھانہ پتریاٹہ اور تھانہ پھگواڑی بھی آج سے  ہی فنکشنل کر دیئے گئے ہیں۔

انہوں نے کہا کہ مری میں ایس پی کوہسار پہلے سے اپنے فرائض سر انجام دے رہے ہیں، مری ٹورازم پولیس کے لیے خصوصی طور  پر تربیت یافتہ فورس تعینات، مرد اور خواتین افسران و اہلکار شامل ہیں۔

ان کا کہنا تھا کہ مری ٹورازم پولیس کے لئے ابتدائی طور پر 150 پولیس افسران و اہلکار ، ایک خصوصی ٹورسٹ وین، 03 خصوصی طور پر تیار گاڑیاں، 25 موٹر سائیکلز، گھڑ سوار دستہ شامل ہیں، مری ٹورازم پولیس کو خصوصی طور پر تیار کردہ گاڑیاں اور موٹرسائیکل فراہم کی گئی ہیں۔

آر پی او راولپنڈی اشفاق احمد نے کہا کہ مری ٹورازم پولیس سیاحوں کے لیے خصوصی  ٹورازم وین بھی تیار کی گئی ہے، سیاحوں کی حفاظت و سہولت کے لیے ٹورازم پولیس میں گھڑ سوارا اہلکار بھی فرائض انجام دیں گے۔

سی پی او راولپنڈی عمر سعید ملک نے کہا کہ سیاحوں کی حفاظت اور سہولت راولپنڈی پولیس کی اولین ترجیح ہے، عید کی چھٹیوں اور لانگ ویک اینڈ کے لیے سیاحوں کی سہولت کے لیے خصوصی پلان تشکیل دیا گیا ہے۔

انہوں نے کہا کہ سیاحوں کے لیے مری ٹورازم پولیس 24 /7 فرائض سرانجام دے گی، مری آنے والے سیاح راہنمائی کے حصول یا ایمرجنسی کی صورت میں مری ٹورازم پولیس ہیلپ لائن 1757 پر کال کریں۔

ان کا کہنا تھا کہ سیاحوں کی آگاہی اور رہنمائی کے لیے آگاہی مہم بھی چلائی جائے گی، چھٹیوں میں ٹریفک کی روانی کو یقینی بنانے اور کپیسٹی سے زائد گاڑیوں کے داخلے پر پابندی پر سختی سے عملدرآمد کیا جائے گا۔

مری ٹورازم پولیس کے افتتاح کے موقع پر پولیس افسران مقامی انتظامیہ کے افسران، بار کے عہدیداران، سول سوسائٹی اور میڈیا رپورٹرز نے شرکت کی۔