بشریٰ بی بی کی سہیلی فرحت شہزادی المعروف فرح خان کے شوہر نے اپنی اہلیہ پر لگائے گئے تمام الزامات کی تردید کردی ہے۔

احسن جمیل گجر کا کہنا تھا کہ اپوزیشن کو عمران خان کے خلاف کچھ نہ ملا تو میری فیملی کو نشانہ بنا کر نیا کیس بنانے کی کوشش کی جارہی ہے۔

انہوں نے اپنے بیان میں کہا کہ کوئی جائیداد جو میڈیا پر آئی ہو ایسی نہیں جسے ہم نے ایف بی آر میں ڈکلئیر نہ کیا ہو۔ ہم نے خود الیکشن کمیشن، گورنمنٹ اور ایف آر کو اپنی تمام جائیدادوں کے بارے میں بتایا ہے۔

اثاثوں میں اضافے کے الزام پر احسن جمیل کا کہنا تھا کہ ہم نے متعلقہ اداروں کو تمام منی ٹریل اور ثبوت فرام کئے ہوئے ہیں۔

انہوں نے کہا کہ کوئی ایسا ٹرانسفر بتائیں جو بینک ٹرانزیکشن کے زریعے نہیں ہوا، یا ہم نے کوئی بلیک منی کا استعمال کیا ہو۔

احسن جمیل نے مزید کہا کہ ہمارے اوپر کوئی الزام نہیں ہے، بلکہ عدالتوں سے سزا یافتہ لوگ ہم بے گناہوں پر الزام تراشیاں کر رہے ہیں۔

انہوں نے کہا کہ دو افراد اتنی بڑی سیاسی جماعتوں کا مقابلہ کیسے کریں گے، انہوں نے بول نیوز کا شکریہ ادا کرتے ہوئے کہ  یہ آپ کی مہربانی ہے مجھے اپنا موقف پیش کرنے کا موقع دیا گیا۔

احسن جمیل نے مزید کہا کہ مجھ سے کسی صحافی نے کوئی رابطہ نہیں کیا، لیکن فرح کے گاؤں اور اس کے بھائی تک پہنچ گئے، کوئی حدود ہوتی ہیں، انہوں نے ہم پر جو ڈی سیوں (ڈپٹی کمشنرز) کا الزام لگایا، کل جو بچے ڈی سی بننا چاہیں وہ کیا سوچیں گے کہ ڈی سی تین تین کروڑ میں بکتے ہیں؟

ان کا کہنا تھا کہ الزام لگایا گیا کوئی ڈی سی یا کمشنر چھ مہنے سے زیادہ نہیں رہ سکتا ، اگر تین تین کروڑ لے کر ڈی سی یا کمشنر لگائے جائیں تو کیا انہیں چھ مہینے کوئی بدل سکتا ہے؟

فرح خان کے شوہر نے کہا کہ ہم بھاگنے والے لوگ نہیں، ہم واپس آئیں گے اور الزام لگانے والوں کے خلاف قانونی کارروائی بھی کریں گے۔