عدالت نے آئی جی پنجاب کیخلاف پنجاب اسمبلی میں تحریک استحقاق لانے کیخلاف درخواست قابل سماعت قراردے دی۔

تفصیلات کے مطابق لاہور ہائیکورٹ نے سیکریٹری اسمبلی اور چیف سیکرٹری پنجاب کو کل طلب کرتے ہوئے  سیکریٹری اسمبلی کو ریکارڈ بھی ساتھ لانے کا حکم دے دیا۔

لاہور ہائی کورٹ نے آئی جی پنجاب کے خلاف پنجاب اسمبلی میں تحریک استحقاق پر راؤ سردار کی درخواست پر فیصلہ محفوظ کیا تھا۔

دورانِ سماعت آج جسٹس شجاعت علی خان نے آئی جی پنجاب کی درخواست پر کیس سماعت کی جس میں انھوں نے کہا کہ آئی جی پنجاب کو خط کس نے لکھا؟

وکیل آئی جی پنجاب نے جواب دیا کہ سیکریٹری پنجاب اسمبلی کی جانب سے آئی جی پنجاب کو خط لکھا گیا۔

وکیل سیکریٹری اسمبلی نے کہا کہ اسمبلی میں جو کچھ ہوا وہ ناقابل تلافی ہے۔ اسمبلی کی استحقاق کمیٹی کی طرف سے ڈپٹی سیکریٹری نے آئی جی کو خط لکھا۔

سیکریٹری پنجاب اسمبلی کے وکیل نے کہا کہ ڈپٹی اسپیکر نے سارجنٹ ایٹ آرمز کو طلب کرنے کی بجائے پولیس کو کیوں طلب کیا؟ عدالت نے منصفانہ انتخابات کروانے کی ہدایت کی۔

وکیل پنجاب اسمبلی کے سیکریٹری نے عدالت کو یہ بھی بتایا کہ پولیس پریشرڈالنے کے لئے اسمبلی کے اندرداخل ہوئی۔ ڈپٹی اسپیکر نے خط کے ذریعے انفارمیشن مانگی ہے۔

وکیل درخواست گزارنے عدالت کو بتایا کہ الیکشن سے قبل اسمبلی تقدس پامال کیا گیا جبکہ وکیلِ سیکریٹری اسمبلی نے دلائل میں کہا کہ پولیس نے آئین پرعملدرآمد کروانے کی بجائے پامالی کی۔

وکیل سیکریٹری پنجاب اسمبلی نے عدالت سے استدعا کی کہ درخواست ناقابل سماعت قرار دیتے ہوئے مسترد کردی جائے۔

عدالت نے درخواست گزارکے وکیل سے استفسار کیا کہ آپ نے کیس میں حکومت پنجاب کو فریق نہیں بنایا۔

درخواست گزارکے وکیل شمیم الرحمان ملک نے فوری حکومت پنجاب کو درخواست میں فریق بنا لیا۔ جس کے بعد عدالت نے فریقین وکلاء کے دلائل سننے کے بعد فیصلہ محفوظ کرلیا تھا۔