وقار مہدی نے کہا ہے کہ عمران خان جو معاشی صورتحال چھوڑ گئے ہیں اسے سنبھالنا مشکل ہے۔

پاکستان پیپلز پارٹی کے رہنما وقار مہدی نے سعید غنی کے ہمراہ پریس کانفرنس کرتے ہوئے کہا ہے کہ بلاول نے جمہوری طریقہ کار سے عمران حکومت کو ہٹایا، جو معاشی صورتحال یہ چھوڑ گئے ہیں اسے سنبھالنا مشکل ہے۔

انہون نے کہا کہ کوشش ہے کہ آنے والے بجٹ میں غریب عوام پر بوجھ نا پڑے، ان کی کوشش رہی کہ حکومت گئی تو ملک میں مارشل لاء آجائے، جب اسٹیبلشمنٹ نیوٹرل ہوگئی تو انہیں پریشانی لاحق ہوگئی۔

وقار مہدی نے کہا ہے کہ یہ لوگوں کو بیوقوف نہیں بنا سکتے، اب ان کے لیے کبھی امپائر کی انگلی نہیں اٹھے گی، اب فیصلہ عوامی رائے سے ہوگا۔

دوسری جانب پاکستان پیپلز پارٹی کے رہنما سعید غنی نے پریس کانفرنس کرتے ہوئے کہا ہے کہ وقار مہدی، جاوید ناگوری اور دیگر شریک ہیں، پیپلز پارٹی کراچی کے کارکنان کے اصرار پر بلاول 15 مئی کو کراچی آرہے ہیں۔

انہوں نے کہا کہ پیپلز پارٹی کارکنان کل شام پانچ بجے بلاول بھٹو کا اولڈ ٹرمینل پراستقبال کریں گے، شہر کے مختلف علاقوں میں استقبالیہ کیمپ لگا دیے ہیں، اجتماع کے لیے کرسیاں نہیں لگائی جائیں گی۔

سعید غنی نے کہا ہے کہ گرمی کی شدت کے باعث میڈیکل کیمپس اور پانی کی سہولت موجود ہوگی، ان کی گوگیاں اور گوگے پنجاب حکومت میں مداخلت کرتے رہے، ان کے خلاف جو بولتا عمران اس سے لڑ پڑتے۔

پاکستان پیپلز پارٹی کے رہنما نے کہا ہے کہ ہم سیاسی مداخلت سے پاک فوج کے ساتھ ہیں، ہم سیاسی مداخلت نا کرنے والی فوج کو سلام پیش کرتے ہیں، عمران اپنی پاگل پن کی سوچ سب پر مسلط کرنا چاہتا ہے۔

انہوں نے کہا کہ آج عمران کا سب سے بڑا مطالبہ ہے کہ الیکشن کراؤ ، پہلے ہم کہتے تھے تو عمران نہیں کراتا تھا، الیکشن کا آئینی اختیار اب شہباز شریف کے پاس ہے، جب مرضی الیکشن کرائیں گے، عمران ڈکٹیشن نا دے۔

سعید غنی نے کہا ہے کہ مدت اسمبلی کی ہوتی ہے، وزیر اعظم کی نہیں، ہماری خواہش ہے کہ اسمبلی دو ہزار تئیس تک مدت پوری کرے، سیاسی جماعتیں چاہیں گی تو مل کر الیکشن کا فیصلہ کرسکتی ہیں۔

پاکستان پیپلز پارٹی کے رہنما نے کہا ہے کہ انتخابات سے پہلے الیکٹورل ریفارمز لازمی ہیں، ہمیں گزشتہ انتخابات پر بھی اعتراضات رہے مگر ہم نے ایوان نہیں چھوڑا، عمران اسمبلی میں بیٹھتا تک نہیں تھا اوراب بھی لوگوں کو منع کرتا ہے کہ ایوان میں نا بیٹھیں۔

انہوں نے کہا کہ عمران ملکی معیشت کی بربادی کی وجہ ہے، اسٹیٹ بینک کی غلامی کا ذمہ دار عمران ہے، پٹرول کی قیمتوں میں اضافے کا معاہدہ آئی ایم ایف سے اس کی حکومت نے کیا۔

سعید غنی نے کہا ہے کہ یہ امریکا یورپ کو گالیاں دے کر ملکی معیشت کو مزید نقصان پہنچانا چاہتا ہے، ہم کتنے بھی سیاسی مخالف ہوں مگر ناموس نبیﷺ پر کوئی سمجھوتہ نہیں کرسکتے۔

پاکستان پیپلز پارٹی کے رہنما نے کہا ہے کہ عمران خان ملک اور قوم کا مجرم ہے، عمران جلسوں میں کہتا ہے کہ میرا پیغام لوگوں تک پہنچاؤ، عمران ماضی میں مودی کا ایجنٹ رہا ہے۔

انہوں نے کہا کہ عوام کسی پاگل شخص کے پیچھے چل کر ملک اور معیشت کو نقصان نا پہنچائیں، اس ملک نے رہنا ہے اور اسے رہنا چاہیے، یہ واحد پاگل سیاسی آدمی  ہے جو اپنے سیاسی رول کے لیے ملک تباہ کرنا چاہتا ہے۔