مریم نواز نے کہا ہے کہ عوام کے لئے مہنگائی کا طوفان لانے سے بہتر ہے حکومت چھوڑ دی جائے۔

پاکستان مسلم لیگ (ن) کی نائب صدر مریم نواز نے سرگودھا میں جلسے سے خطاب کرتے ہوئے کہا کہ سرگودھا نوازشریف سے پیار کرنے والوں کا شہرہے، نوازشریف لندن میں بیٹھ کر جلسےکودیکھ رہے ہیں جبکہ نوازشریف کو لوگ کہہ رہےہیں کہ واپس آجائیں آپ کی ضرورت ہے۔

انہوں نے کہا کہ کہا جاتا تھا نوازشریف کی سیاست ختم ہوگئی، آج ہر جگہ نوازشریف کے نعرے لگ رہے ہیں۔

مریم نواز نے یہ بھی کہا کہ نوازشریف نے ملکی معیشت کو درست سمت میں گامزن کیا جبکہ نواز شریف نے پاکستان سے لوڈشیڈنگ کا بھی خاتمہ کیا۔

پاکستان مسلم لیگ (ن) کی نائب صدر کا کہنا تھا کہ ایک کھلنڈرے اور نااہل کو پاکستان کے عوام پرمسلط کیا گیا، نااہل کے آنے کے بعد لوڈشیڈنگ دوبارہ شروع ہوگئی اور معیشت بھی تباہ ہوگئی۔

ان کا یہ بھی کہنا تھا کہ یہ شخص ایک منٹ بھی اپنی کارکردگی پر بات نہیں کرسکتا جبکہ 4 سال میں ملک کو تباہ کرنے والا شہبازشریف سے4 ہفتوں کاحساب مانگ رہا ہے۔

مریم نواز نے کہا کہ پہلے اس جھوٹے شخص نے 35پنکچر کا ڈرامہ کیا لیکن ثبوت نہیں دیا اور اب جعلی خط لے آیا لیکن اس کا بھی کوئی ثبوت نہیں دیا۔

مریم نواز نے یہ بھی کہا کہ غیرملکی سازش کا بھی جھوٹا ڈرامہ کیا، اب ایک اور ڈرامہ کیا کہ میرے قتل کی سازش ہورہی ہے۔

ان کا کہنا تھا کہ نوازشریف اور شہبازشریف کو عوام کااحساس ہے، نوازشریف اور شہبازشریف کیلئےکسی چیز کی قیمت ایک روپے بڑھانا بہت مشکل کام ہے۔

مریم نواز نے کہا کہ اگر حکومت کو پیٹرول کی قیمت بڑھانی پڑے تو اس کےذمہ دار عمران خان  ہیں جبکہ آج اگر ڈالر آسمان پر اور معیشت وینٹی لیٹر پر ہےتواس کے ذمہ دار بھی عمران خان ہیں۔

پاکستان مسلم لیگ (ن) کی نائب صدر نے یہ بھی کہا کہ شہبازشریف آپ کی طرح نہیں ، وہ آلو اور پیاز کی قیمت ٹھیک کرنے آئے ہیں، نوازشریف کہتا ہےحکومت چھوڑدوں گا لیکن عوام پر بوجھ نہیں ڈالوں گا۔

ان کا کہنا تھا کہ ہم اس لیےحکومت میں آئےکیونکہ عمران خان اگلے الیکشن پر بھی ڈاکہ ڈالنا چاہتا تھا لیکن ہم نے حکومت میں آکر عمران خان کے پلان کوفیل کردیا۔

پاکستان مسلم لیگ (ن) کی نائب صدر مریم نواز کا مزید کہنا تھا کہ مہنگائی کا طوفان لانے سےحکومت چھوڑنا بہتر ہے، عمران خان  کی حکومت گرا کر اس کے 12سالہ پلان کوفیل کردیا اور اب عمران خان آپ کچھ بھی کرو آپ کا کھیل ختم ہوگیا ہے۔