ذرا تصور کریں کہ آپ کسی انجان جگہ پر راستہ بھٹک جائیں تو سب سے پہلے کیا کام کریں گے؟

آج کے دور میں اس بات کا جواب ایک چھوٹا بچہ گوگل میپ کی شکل میں دے گا، لیکن آج سے 17سال پہلے اس بات کا جواب کوئی جہاندیدہ شخص ہی دے سکتا تھا، جسے راستوں کی سمجھ بوجھ ہوں۔

لیکن 2005 میں امریکی ٹیکنالوجی جائنٹ گوگل کی متعارف کرائی گئی ایپلی کیشن گوگل میپپ نے آج ہماری زندگی میں بہت سی سہولیات کے در وا کردیے ہیں۔

دور حاضرکی تیز رفتارزندگی میں گوگل میپ کے بنا کہیں جانے کا تصور بھی محال لگتا ہے۔ ٹیکنالوجی جائنٹ نے اپنے استعمال کنندگان کےلیے گوگل میپ میں ایک اور شاندارفیچر کا اضافہ کردیا ہے۔

اس نئے فیچر کی بدولت اینڈروئیڈ اورایپل صارفین میپ کے ’ اسٹریٹ ویو ‘ فیچر کے ذریعے کسی بھی جگہ کی ماضی کی تصاویر دیکھ سکیں گے۔

گوگل کی آفیشل بلاگ پوسٹ پراس فیچر کے بارے دی گئی تفصیلات کے مطابق گوگل نے اسٹریٹ ویو فیچر کی 15 ویں سالگرہ کے موقع پریہ نیافیچراورایک برانڈ نیو کیمرا بھی جاری کیا ہے۔

 اس بات کمپنی کا کہنا ہے کہ آئکونک اسٹریٹ ویو فیچر میں 100 سے زائد ممالک کی  220 ارب تصاویر شامل کردی گئی ہیں، جن کی مدد سے موبائل صارفین ایپ کے ذریعے دنیا کے تاریخی مقامات کی سیر بھی کر سکیں گے۔ گوگل کی جانب سے اسٹریٹ ویو ڈیٹا جمع کرنے والے نئے کیمرے کی رونمائی بھی کی گئی ہے۔

15 پاؤنڈ سے بھی کم وزن کے حامل اس فون کو آئندہ سال سے گوگل کی اسٹریٹ ویو کاروں اور ٹریکرز کے بیک پیک کے لیے پیش کیا جائے گا۔

گوگل کا یہ پورٹ ایبل کیمرا ان علاقوں کی تفصیلی تصاویر لے سکتا ہے جہاں میپ موجود نہیں ہے، اسے باآسانی کسی بھی گاڑی کی چھت پر لگا کر موبائل کی مدد سے بہترین تصاویر لی جاسکتی ہیں۔

تاہم اس کیمرے کی قیمت اور دیگر فیچرز کے بارے میں مزید تفصیلات جاری نہیں کی گئی ہیں۔