پی ٹی آئی رہنماء مراد سعید نے کہا ہے کہ پنجاب حکومت کا کوئی جواز باقی نہیں۔

سیدپور میں جلسے سے پی ٹی آئی رہنماء مراد سعید نے خطاب کرتے ہوئے کہا کہ اپنے قائد عمران خان کا پیغام گھر گھر پہنچا رہا ہوں، ایک مہینے سے راولپنڈی اسلام آباد اور ملک بھر میں  تبلیغ کیلئے نکلا ہوں۔

 مراد سعید نے کہا کہ جس کو بھی حقیقی آزادی کی دعوت دینے جائیں تو وہ ہم سے پہلے انتظار میں ہوتا ہے کہ عمران خان کب کال دیں گے۔

پی ٹی آئی رہنماء کا کہنا تھا کہ لوٹوں کے حوالے سے فیصلہ آگیا ہے، پنجاب حکومت کا کوئی جواز باقی نہیں جبکہ امپورٹڈ حکومت جو بھرونی سازش سے آئے ان کا بھی کوئی جواز باقی نہیں رہا۔

ان کا یہ بھی کہنا تھا کہ ہم اپنے لئے نہیں پاکستان کیلئے جمع ہوئے ہیں، شہباز شریف تم بھکاری ہو، پاکستانی قوم نہیں۔

انہوں نے کہا کہ عمران خان نے اقوام متحدہ میں ناموس رسالت کا مقدمہ لڑا جبکہ عمران خان نے کہا میرے پاکستانی مزید کسی کی جنگ کا ایندھن نہیں بنے گا۔

مراد سعید نے کہا کہ رانا ثناء اللہ نے جو اداروں کا نام لیا ہے وہ بڑا خطرناک ہے۔

پی ٹی آئی رہنماء مراد سعید نے مزید کہا کہ آج ڈالر انتہائی مہنگا ہورہا ہے اور شہباز شریف باہر جاکر ایک مفرور سے مشورے کررہا ہے، ہم نے ان چوروں اور ڈاکوؤں سے نجات کیلئے عمران خان کی کال پر نکلنا ہے، پورا پاکستان نکل رہا ہے۔