بھارت کی جنوب مغربی کنڑ فلم انڈسٹری کی معروف اداکارہ چیتنا راج سرجری کے دوران جان سے ہاتھ دھو بیٹھیں۔

گزشتہ کچھ عرصے سے چیتنا کو وزن میں اضافے جیسے مسئلے کے باعث کیریئر میں دشواریاں پیش آرہی تھیں۔

چیتنا نے 16 مئی کو بنگلورو میں راج جی نگر میں واقع شیٹیز کاسمیٹک سینٹر سے فیٹ فری پلاسٹک سرجری کا فیصلہ کیا لیکن دوران سرجری پیدا ہونے والی پیچیدگیوں کے باعث اداکارہ کے پھیپھڑوں میں سیال مادہ جمع ہونے لگا اور وہ چل بسیں۔

تذبذب کی شکار اداکارہ نے اسی لیے والدین کے علم میں لائے بغیر پلاسٹک سرجری کا فیصلہ کیا۔

اینستھیسٹسٹ میلون پلاسٹک سرجری کرنے والے ڈاکٹرز کے ہمراہ چیتنا کو شام ساڑھے 5 بجے کاڈے اسپتال لے کر آئے اور ڈاکٹروں کو دھمکیاں دی کہ مریضہ کو ایسے ٹریٹ کریں کہ اسے دل کا دورہ پڑا ہے۔

کاڈے اسپتال کے ڈاکٹرزکی جانب سے 45 منٹ تک سی پی آر کی کوشش کرنے کے باوجود چیتنا کی سانسیں بحال نہ ہوئیں۔

آئی سی یو کے ماہر ڈاکٹر سندیپ نے بساویشور نگر پولیس اسٹیشن کے انسپکٹر کو شکایت میں بتایا کہ چیتنا کو شام 6 بج کر 45 منٹ پر مردہ قراردیا گیا تھا جبکہ کاسمیٹک سینٹر کے ڈاکٹرز جانتے تھے کہ چیتنا کا انتقال ہوچکا ہے۔

اداکارہ کی موت کی خبر سن کر چیتنا کے والدین نے ڈاکٹرز پرغفلت برتنے کا الزام عائد کیا ہے جبکہ کنڑ فلم انڈسٹری کی معروف شخصیات اور ان کے قریبی ساتھیوں نے بھی پلاسٹک سرجری کرنے والے ڈاکٹروں کے خلاف سخت قانونی کارروائی کا مطالبہ کیا ہے۔