سندھ ہائی کورٹ نے الیکشن کمیشن اور دیگر اداروں کو ازسرنو نوٹس جاری کرتے ہوئے  فریقین سے 13 مئی کو جواب طلب کرلیا۔ 

سندھ ہائیکورٹ میں سندھ بلدیاتی انتخابات کے شیڈول خلاف جی ڈی اے کی درخواست پر سماعت ہوئی۔

وکیل جی ڈی اے نے کہا کہ ہفتے کے روزعدالت کی جانب سے نوٹس جاری کرنے کی اطلاع ملی۔ نوٹس کی تعمیل نہیں ہوسکی، مہلت دی جائے۔

وکیل درخواست گزار نے عدالت سے کہا کہ بلدیاتی انتخابات کے لیے شیڈول کا اعلان حکومت سندھ نے کرنا ہے۔ صوبائی حکومت کے اعلان کردہ شیڈول پر الیکشن کمیشن عمل درآمد کرنے کا پابند ہے۔

جی ڈی اے کی جانب سے وکیل نے درخواست میں عدالت سے استدعا کی کہ انتخابی شیڈول پرعملدرآمد سے روکا جائے۔

سندھ میں بلدیاتی انتخابات کے شیڈول کو سندھ ڈیموکریٹک الائنس نے چیلنج کررکھا ہے۔

یہ خبر بھی پڑھیں

سندھ میں بلدیاتی انتخابات کےشیڈول کیخلاف تحریک انصاف کی درخواست پرعدالت نے فریقین سے جواب طلب کر لیا۔ 

سماعت کے دوران وکیل تحریک انصاف نے دلائل میں کہا کہ الیکشن کمیشن مشاورت کے بغیر ہی انتخابی شیڈول جاری کردیا۔ لاہور ہائیکورٹ نے بھی بلدیاتی انتخابات سے متعلق نوٹیفکیشن معطل کردیا ہے۔

تحریک انصاف کی درخواست میں مؤقف پیش کیا گیا کہ الیکشن کمیشن کی جانب سے سندھ میں بلدیاتی انتخابات کے پہلے مرحلے کے شیڈول کا اعلان کیا گیا ہے۔ الیکشن کمیشن کی جانب سے 13 اپریل کو جاری کیا گیا نوٹیفیکیشن غیر قانونی غیرآئینی ہے۔