شیخ خلیفہ بن زید النہیان کے انتقال پر تعزیت کے لئے وزیراعظم شہباز شریف آج متحدہ عرب امارات کا دورہ کریں گے۔

اس حوالے سے ذرائع کا کہنا ہے کہ وزیر اعظم شہباز شریف یو اے ای کے صدر کے انتقال پر تعزیت کرنے آج دبئی روانہ ہوں گے۔

اس دوران وزیراعظم پاکستان کی جانب سے یواے ای کی قیادت اور عوام سے اظہار افسوس کریں گے ۔

شیخ خلیفہ بن زید النہیان کے انتقال پر  وزیراعظم کا کہنا ہے کہ پاکستان کے عظیم دوست شیخ زید کی وفات کے بعد شیخ خلیفہ بن زید نے اپنے والد کے مشن کو قابلیت سے آگے بڑھایا۔

انہون نے کہا کہ شیخ زید نے یواے ای کی فیڈریشن کی بنیاد رکھی تھی، شیخ خلیفہ نے اسے مزید مضبوط کیا اورمثالی ترقی دی اور پچاس سال کی مسلسل محنت سے شیخ خلیفہ نے یواے ای کے لئے اپنے والد کے ترقیاتی وژن کو نئی بلندیوں سے ہمکنار کیا۔

ان کا کہنا تھا کہ شیخ خلیفہ مرحوم نے اپنے دور میں مشاورت کو اپنی قوت بنایا، وہ عوام سے رابطے میں رہتے تھے، وہ اعلی تعلیم یافتہ اور زیرک شخصیت تھے جنہوں نے اپنے اقتدار کو ملک اور عوام کی خدمت کے لئے وقف رکھا۔

اس موقع پر وزیراعظم نے اپنے جذبات کا اظہار کرتے ہوئے کہا کہ یخ زید کی طرح شیخ خلیفہ بن زید النھیان کی وفات امت مسلمہ کا ایک بڑا نقصان ہے ۔

اس موقع پر وزیراعظم نے متحدہ عرب امارات کے صدر  کے دعائے مغفرت کی اور کہا کہ پاکستان دکھ کی اس گھڑی میں متحدہ عرب امارات کی حکومت اور عوام کے ساتھ کھڑا ہے۔

خیال رہے کہ یو اے ای کے صدر اور ابوظہبیٰ کے حکمران شیخ خلیفہ بن زائد النہیان انتقال کرگئے۔

متحدہ عرب امارات کی وزارت برائے صدارتی امور کی جانب سے ابوظہبیٰ کے حکمران شیخ خلیفہ بن زائد النہیان کے انتقال پر 40 دن کے سوگ کا اعلان کیا گیا ہے جب کہ وزارت کی جانب سے جاری اعلان میں 3 دن کی عام تعطیل کا اعلان بھی کیا گیا ہے۔

یاد رہے کہ خلیفہ بن زاید آل نہیان کے انتقال پر پاکستان میں بھی تین روزہ قومی سوگ کا اعلان کیا گیا ہے۔