سلطان محمود چوہدری نے کہا ہے کہ بھارت نے مقبوضہ کشمیر میں لاکھوں غیر ریاستی ہندوؤں کو جعلی ڈومیسائل جاری کیے ہیں۔

صدر آزاد جموں وکشمیر بیرسٹر سلطان محمود چوہدری سے سینیٹر ڈاکٹر زرقہ سہروردی کی ایوان صدر کشمیر ہاؤس اسلام آباد میں تفصیلی ملاقات ہوئی جس میں باہمی دلچسپی سمیت دیگر امور پر تبادلہ خیال کیا گیا۔

ملاقات میں صدر آزاد جموں وکشمیر بیرسٹر سلطان محمود چوہدری نے کہا کہ سینیٹ مسئلہ کشمیر کو اُٹھانے میں پہلے بھی موثر کردار ادا کرتی رہی ہے اور ہمیں امید ہے کہ اس سلسلے میں اب بھی یہ اہم ادارہ اپنا کردار ادا کرے گا۔

انہوں نے کہا کہ بھارت کے پانچ اگست 2019کے مقبوضہ کشمیر کی خصوصی حیثیت تبدیل کرنے کے غیر قانونی اقدامات کے بعد بھارت نے مقبوضہ کشمیر میں کشمیری عوام پر ظلم و بربریت کے پہاڑ توڑ دئیے ہیں۔

سلطان محمود چوہدری کا کہنا تھا کہ مقبوضہ کشمیر میں آبادی کے تناسب کو تبدیل کرنے کے لئے بڑے پیمانے پر اقدامات اُٹھانے شروع کر دیئے ہیں اور اس سلسلے میں بھارت نے مقبوضہ کشمیرمیں بیالیس لاکھ غیر ریاستی ہندوؤں کو جعلی ڈومیسائل جاری کیے ہیں۔

صدر آزاد جموں وکشمیر کا یہ بھی کہنا تھا کہ چار ہزار سے زائد بھارتی سرمایہ کاروں کو وہاں کاروبار کے بہانے آباد کرنے کی کوشش کی جا رہی ہے لہذا ایسے موقع پر پاکستان کے سینیٹ کو اپنا کردار بھرپور طریقے سے ادا کرنا چاہیے اور مسئلہ کشمیر کو عالمی سطح پر اُٹھانے کے لئے اقدامات کرنے چاہیے۔

صدر ریاست آزاد جموں وکشمیر بیرسٹر سلطان محمود چوہدری کا مزید کہنا تھا کہ میں نے او آئی سی کی خصوصی دعوت پر او آئی سی ہیڈ کوارٹر جدہ کا دورہ کیا اور وہاں پر او آئی سی کے سیکرٹری جنرل اور دیگر اعلیٰ عہدیدارن سے ملاقاتیں کر کے مسئلہ کشمیر اور مقبوضہ کشمیر میں جاری بھارتی مظالم پر انہیں بریفنگ دی۔

اس موقع پر سینیٹر ڈاکٹر زرقہ سہروردی نے صدر آزاد جموں وکشمیر بیرسٹر سلطان محمود چوہدری کی مسئلہ کشمیر کو عالمی سطح پر اُجاگر کرنے کی کوششوں کو سراہا جبکہ امریکی کانگریس وویمن الہان عمر، صدر ریاست کے او آئی سی کے دورے اور او آئی سی وزرائے خارجہ کانفرنس سمیت او آئی سی کشمیر کنٹیکٹ گروپ کے خطاب میں مسئلہ کشمیر کو اُجاگر کرنے کی کوششوں پر بھی انہیں خراج تحسین پیش کیا۔