احسن اقبال نے کہا ہے کہ ترقیاتی بجٹ کا کسی بھی ملک کی ترقی میں اہم کردار ہوتا ہے۔

 وفاقی وزیر منصوبہ بندی احسن اقبال کی زیر صدارت پی ایس ڈی پی 2022-23 میں شامل منصوبوں کا اجلاس ہوا۔

اجلاس میں سیکرٹری منصوبہ بندی سید ظفر علی شاہ ، وزارتوں اور محکموں کے  افسران نے شرکت کی۔

اجلاس کی صدارت کرتے ہوئے احسن اقبال نے کہا کہ ملک کو اس وقت  اقتصادی میدان میں غیر معمولی حالات کا سامنا ہے۔

وفاقی وزیر منصوبہ بندی نےکہا کہ ترقیاتی بجٹ کا کسی بھی ملک کی ترقی میں اہم کردار ہوتا ہے، 2017 میں ترقیاتی بجٹ کا حجم 1000ارب پرچھوڑا جبکہ آج ترقیاتی بجٹ 500 ارب سے بھی کم حجم پر ہے۔

احسن اقبال کا کہنا تھا کہ پاکستان کی 75 سالہ تاریخ میں کبھی ایسا نہیں ہوا کہ چوتھی سہ ماہی میں فنڈز جاری نہ ہوئے ہوں۔

انہوں نے کہا کہ سقوط ڈھاکہ یا ایٹمی دھماکوں کے نتیجے میں لگنے والی پابندیوں کے بعد بھی ملک اتنی بد حالی کا شکار نہیں ہوا جس کا سامنا آج کرنا پڑ رہا ہے : وفاقی وزیر

احسن اقبال نے یہ بھی کہا کہ فنڈز کا استعمال کرتے ہوئے خیال رکھا جائے کہ ترقیاتی بجٹ ادھار کے پیسوں کا ہے۔

وفاقی وزیر منصوبہ بندی احسن اقبال نے مزید کہا کہ جاری منصوبوں خاص کر وہ منصوبے جن پر 70% کام ہو چکا ہے جلد مکمل کیا جائے، اگلے بجٹ میں صرف اہم قومی منصوبوں کو فوقیت دی جائے گی۔