آئی ایم ایف نے وسطی جمہوریہ افریقا اور ایلسلواڈور کو بٹ کوائن اپنانے پر وارننگ جاری کردی ہے۔

بین الاقوامی مالیاتی جریدے بلومبرگ کے مطابق آئی ایم ایف نے وسط افریقی اور امریکی ممالک کو کرپٹو کرنسی قبول کرنے پر تنبیہہ جاری کرتے ہوئے کہا ہے کہ بٹ کوائن کی لین دین کو قانونی شکل دینے سے مشکلات میں اضافہ پوسکتا ہے۔

 تاہم وسطی جمہوریہ افریقا کی حکومت کا اس بابت کہنا ہے کہ بٹ کوائن کو قانون کے دائرے میں لانے سے اس کی معیشت میں بہتری آئے گی۔

یہ بھی پڑھیں:امریکی بینک کا بٹ کوائن کے بعد ایتھریم میں ٹریڈنگ کا اعلان

بین الاقوامی مالیاتی فنڈز کی جانب سے وسطی امریکا کے ملک ایلسلواڈورمیں میکرو اکنامکس کے نام پر بٹ کوائن کو قانونی شکل دینے پر تحفظات کا اظہار کیا گیا ہے۔

وسطی جمہوریہ افریقا کا شمار دنیا کے غریب ترین ممالک کی فہرست میں کیا جاتا ہے اور ھزشتہ حکومت کی جانب سے بٹ کوائن کی خرید و فروخت کو قانونی قرار دینے کا اعلان کیا گیا تھا۔ جس کے بعد یہ دنیا کا دوسرا اور افریقا کا پہلا ملک بن گیا ہے جہاں بٹ کوائن کی لین دین کو قانونی شکل دی گئی ہے۔

یہ بھی پڑھیں: کرپٹو کرنسی کے اشتہارات پر درجنوں کمپنیوں کو نوٹس جاری

دنیا بھر میں اپنے رکن ممالک کے لیے مانیٹری پالیسی اور مستحکم شرح نمو کو فروغ دینے والے ادارے آئی ایم ایف کا اس بابت کہنا ہے کہ مذکورہ افریقی ملک کی جانب سے بٹ کوائن کو قانونی شکل دینے سے بڑے قانونی، شفافیت اور معاشی پالیسیوں کے چیلنجز پیدا ہوگئے ہیں۔

دوسری جانب وسطی جمہوریہ افریقا کا ماننا ہے کہ دیگر ممالک اور کمپنیوں کی طرح کرپٹو کرنسی خصوصاً بٹ کوائن کو خصوصی طور پر اپنانے سے اسے اپنی معاشی حالات بہتر کرنے میں کافی مدد ملے گی۔

عالمی اعداد و شمار کے مطابق اس افریقی ملک میں صرف چار فیصد لوگوں کو انٹرنیٹ تک رسائی حاصل ہے۔

وسطی جمہوریہ افریقا کے صڈر فاؤسٹن آرچینج نے گزشتہ ہفتے ہی پارلیمنٹ کی جانب سے بٹ کوائن کو قانونی طور پر تسلیم کی جانے والی کرنسی کے طور پر قبول کرنے کی دستاویز پر دستخط کیے تھے۔

 واضح رہے کہ دنیا بھر میں کرپٹو کرنسی کے حوالے سے قانون سازی کی جارہی ہے جب کہ بہت سے اداروں نے ادائیگیوں کے لیے کرپٹو کرنسی کو قبول کرنا شروع کردیا ہے۔

وسطی امریکا کے ملک ایلسلوا ڈور نے گزشتہ سال ستمبر میں کرپٹو کرنسی کی بابت قانون سازی کرتے ہوئے ملک میں بٹ کوائن کی ٹرانزیکشنز کو قانونی قرار دے دیا تھا۔ جس کے بعد اس کی معیشت میں کافی بہتری دیکھنے میں آئی۔

رواں سال فروری میں ہی ایلسلوا ڈور کے زیر سیاحت مورینا ویلدیز نے کہا تھا کہ بٹ کوائن کو قانون کے دائرے مین لانے کے بعد ملک میں سیاحت کی شرح میں تیزی سے اضافہ ہوا اور تاریخ میں پہلی بار ملک کی مجموعی پیداوار ( جی ڈی پی) کی شرح دس فیصد سے بڑھ کر تیس فیصد سے بھی زائد ہوگئی ہے۔

ارجنٹینا کے نجی بینکوں نے بھی گزشتہ ہفتے بٹ کوائن اور دیگر کرپٹو کرنسیوں کی خرید وفروخت کا آپشن پیش کردیا تھا تاہم حکومت نے بین الاقوامی مالیاتی فنڈز کے ساتھ ہونے والے 45 ارب ڈالر معاہدے کے تناظر ملک بھر میں کرپٹو کرنسی کو غیر قانونی قرار دے دیا ہے۔