شہر کراچی کے بیشتر علاقوں لوڈشیڈنگ کا دورانیہ بڑھنے لگا ہے جس پر کے الیکٹرک کی جانب سے اہم وضاحت پیش کی گئی ہے۔

 لوڈشیڈنگ کے حوالے سے کے الیکٹرک کے ترجمان کا کہنا ہے کہ بجلی کی فراہمی بلوں کی ادائیگی سے مشروط ہے، عدم ادائیگی پر منقطع ہونے والے کنیکشنز کو لوڈ شیڈنگ سے تشبیح دینا درست نہیں ہے۔

ترجمان کے الیکٹرک نے کہا کہ شہر میں شیڈول کے مطابق لوڈ شیڈنگ کی جا رہی ہے۔

ترجمان نے بتایا کہ کراچی میں 14 گھنٹے کی لوڈ شیڈنگ کے حوالے سےگردش کرنے والی خبروں کی سختی سے تردید کرتے ہیں، لوڈ شیڈنگ کا شیڈول کے-الیکٹرک کی ویب سائٹ پر موجود ہے اور رجسٹرڈ صارفین کو بذریعہ ایس ایم ایس مطلع بھی کیا جاتا ہے۔

اس حوالے سے ترجمان کا کہنا تھا کہ  20 فیصد سے کم نقصان والے علاقوں میں لوڈ شیڈنگ نہیں کی جارہی ہے جبکہ 400 کے قریب صنعتی فیڈرز پر بھی لوڈ شیڈنگ نہیں کی جا رہی ہے۔

ترجمان نے واضح کیا کہ لانڈھی، بھینس کالونی اور کچھ دیگر علاقوں میں عدم ادائیگی پر کچھ کنیکشنز منقطع کئے گئے۔

خیال رہے کہ  شہر قائد میں گرمی کی شدت بڑھنے کے ساتھ ہی کے الیکٹرک کی جانب سے غیراعلانیہ لوڈ شیڈنگ کا سلسلہ شروع کردیا گیا ہے۔

لانڈھی، کورنگی، ملیر، پی ای سی ایچ ایس، گلشن معمار، گلشن اقبال، گلستان جوہر، نیو کراچی، فیڈرل بھی ایریا، اورنگی ٹاؤن، ناظم آباد سمیت شہر کے مختلف علاقوں میں لوڈ شیڈنگ کا سلسلہ شروع کردیا گیا ہے اور 4 سے 10 گھنٹے کی غیراعلانیہ لوڈشیڈنگ کی جا رہی ہے۔