کاشف مرزا نے کہا ہے کہ ملک بھر میں اسکولز تدریس کیلئے کھلے رہیں گے۔

آل پاکستان پرائیویٹ اسکولز فیڈریشن کے صدر کاشف مرزا نے اپنے ایک بیان میں کہا کہ  پہلے ہی کوویڈ کے دوران مسلسل بندش سے بچے تعلیمی نقصان، اعصابی کشیدگی اور مایوسی کا شکار ہیں۔

انہوں نے کہا کہ پاکستان میں اسکولز 2 سال میں تقریباً 74 ہفتوں کیلئے7بار مکمل طور پر بند کیے گئے ہیں لہذا اب ملک بھر اسکولز تدریس کیلئے کھلے رہیں گے۔

کاشف مرزا کا کہنا تھا کہ اپنے اور قوم کے مستقبل کو محفوظ بنانا ہوگا ، بروقت حل نہ نکالا گیا تو بچوں کے مستقبل پر ناقابل تلافی منفی اثرات ہونگے۔

آل پاکستان پرائیویٹ اسکولز فیڈریشن کے صدر کاشف مرزا کا مزید کہنا تھا کہ حکومتی سطح پر بھی اس مسئلے کو دیکھا جائے، اسکولز، اساتذہ، والدین اور سماجی و اصلاحی تنظیمیں کردار ادا کریں۔

واضح رہے کہ سندھ کے تعلیمی اداروں میں گرمی کی چھٹیوں کا اعلان کردیا گیا ہے۔

محکمہ تعلیم سندھ کی جانب سے تعلیمی اداروں میں گرمیوں کی چھٹیوں اعلان کیا گیا ہے، صوبائی محکمہ تعلیم نے موسم گرما کی سالانہ تعطیلات کا نوٹی فکیشن بھی جاری کردیا ہے۔

محکمہ تعلیم سندھ کی جانب سے جاری نوٹیفکیشن کے مطابق کراچی، حیدر آباد، سکھر اور لاڑکانہ سمیت سندھ  بھر کے تمام سرکاری، نجی اور نیم سرکاری تعلیمی ادارے یکم جون سے 31 جولائی تک بندرہیں گے۔

شیڈول کے مطابق یکم اگست سے اسکولوں میں تعلیمی سر گرمیوں کا آغاز ہوگا ۔ موسم گرما کی تعطیلات کا فیصلہ اسٹیرنگ کمیٹی کے اجلاس میں کیا گیا تھا ۔