سعد رضوی نے کہا ہے کہ عوام کو دھوکا دینے کے لیے گفتگو کو اسلامی ٹچ دینا منافقت ہے۔

امیر تحریک لبیک پاکستان حافظ سعد حسین رضوی نے عمران خان کے مصنوعی ”اسلامک ٹچ” پر ردعمل دیتے ہوئے کہا ہے کہ قاسم سوری نے عمران خان کے کان میں اسلامک ٹچ والی سرگوشی کرکے عمران خان کوایکسپوز کردیا۔

انہوں نے کہا کہ عمران خان اپنی تقریر کے ساتھ ساتھ اپنے کردار کو بھی اسلامی ٹچ دیں، عوام کو دھوکا دینے کے لیے گفتگو کو اسلامی ٹچ دینا منافقت ہے، ریاست مدینہ میں بھائی چارہ تھا، برداشت تھی، اخوت تھی۔

سعد رضوی نے کہا ہے کہ آئندہ انتخابات میں عوام تحریک انصاف کو اس طرح مسترد کریں گے جس طرح آزادی مارچ کومسترد کیا، عمران خان کے تمام مذہبی اقدامات محض اسلامی ٹچ تھے۔

امیر تحریک لبیک پاکستان نے کہا ہے کہ عمران خان کا اسلام سے کوئی تعلق نہیں بلکہ اسلام آباد پر قابض ہونا مقصد ہے، اللہ تعالیٰ نے عمران خان کی مذہب پسندی، اسلامو فوبیا اور اسلام پرستی کی حقیقت بھی بے نقاب کردی۔

انہوں نے کہا کہ پاکستان میں یورپی طرز پر اسلام کا نفاذ نہیں بلکہ اللہ اور اس کے رسولﷺ  کے بتائے ہوئے دین کا نظام چلے گا، عمران خان انتخابات ہار گئے تو جس طرح آج اقتدار کی خاطر ملک میں انارکی اور انتشار کی آگ بھڑکا رہے ہیں بعد میں بھی اس سے پیچھے نہیں ہٹیں گے۔

 سعد رضوی نے کہا ہے کہ عمران خان بتائیں اقتدار کی خاطر ملک میں انارکی پھیلانا اور لوگوں کا استعمال کونسی ملک کی خدمت ہے، عمران خان کو کوئی بھی سنجیدگی سے نہیں لے رہا لوگ سمجھتے ہیں یہ ان کی بقا کا مسئلہ ہے اس لیے وہ مذہب کا سہارا لے رہے ہیں۔

 امیر تحریک لبیک پاکستان نے کہا ہے کہ  پاکستان کی عوام متحرک اور سرگرم ہیں، صاف نظر آرہا ہے کہ عمران خان کا اقتدارکا جھگڑا ہے، اس میں مذہب کا کوئی دخل نہیں ہے۔