جماعت اسلامی کے رہنما حافظ نعیم الرحمان نے کراچی کاررواں میں شہرقائد کے لیے 24 نکاتی چارٹ آف ڈیمانڈ پیش کردیا ہے۔

شرکا سے خطاب میں رہنما جماعت اسلامی کا کہنا تھا کہ ہم کراچی کو مہاجر، سندھی اورپختون میں تو تقسیم کرتے ہیں، لیکن اس شہر کو اس کا جائز حق نہیں دیتے۔ اگر کراچی کی آبادی کی درست طریقے سے مردم شماری کرلی جائے تو پھروزیراعلی ساڑھے تین کروڑ آبادی والے اس شہر سے ہی ہوگا۔

ان کا کہنا تھا کہ ایم کیو ایم نے اس شہرسے مینڈیٹ لے کروڈیروں اورجاگیرداروں کے ہاتھوں فروخت کردیا، ہم اعلان کرتے ہیں کہ کہ کراچی کے عوام اپنا پورا حق لیں گے۔ اس موقع پر انہوں نے کراچی میں موجود اہم مسائل کے حل کے لیے درج ذیل چارٹر آف ڈیمانڈ پیش کیا;

کراچی کی اصل آبادی پر ڈاکا نہیں چلے گا۔ کراچی کی پوری گنتی کی جائے۔

کراچی میں با اختیار شہری حکومت کا نظام قائم کریں۔

پانی کا کے فور منصوبہ مکمل کرو، کراچی کو پانی دو۔

کراچی کے لیے باعزت ماس ٹرانسپورٹ نظام بناؤ۔

لوڈ شیڈنگ اورمہنگی بجلی کا خاتمہ کیا جائے۔

کراچی میں ایک انفارمیشن ٹیکنالوجی یونیورسٹی قائم کی جائے۔

صعنتی علاقوں کے مسائل کوترجیحی بنیادوں پرحل کریں۔

کراچی کے نوجوانوں کوسرکاری نوکریاں دو۔

کراچی کے تمام 7 اضلاع میں ایک ایک 500 بستروں کا جدید اورمعیاری اسپتال تعمیرکرو

پولیس کو سیاسی وابستگی اور مداخلت سے پاک کرکے مکمل طورپرخودمختارادارہ بنایا جائے ۔

سالہاسال پرانے سیوریج انفراسٹرکچرکا سروے کرا کرناقص لائنوں کی جگہ نئی لائئنیں ڈالی جائیں۔

سیوریج لائنوں سے پلاسٹک کی تھیلیوں، کچرے، ریت اوراینٹوں وغیرہ سے صفائی کا باقاعدہ نظام بنایا جائے۔

شہر میں آوارہ کتوں کے خاتمے کے لیے سائنسی بنیادوں پر کوئی پروگرام شروع کیا جائے۔

کراچی کی 500 سے زائد کچی آبادیوں کو متبادل سستے پلاٹ / فلیٹ فراہم کیے جائیں۔

کراچی میں کم آمدنی کے لوگوں کے لیے رہائش کا مسئلہ حل کیا جائے

کوآپریٹوہاؤسنگ سوسائٹیزکے الاٹیزکوان کی زمینوں کا قبضہ دلوایا جائے اور ان ے مسائل حل کیے جائیں۔

ناکارہ اسٹریٹ لائٹس کی مرمت اورنئی اسٹریٹ لائٹس کی تنصیب کی جائے۔

ماہی گیروں کے مسائل حل کیے جائیں۔

ہریونین کونسل میں ایک ماڈل فیملی پارک اورایک کھیل کا میدان تعمیرکیا جائے۔

کراچی کے ساحلی علاقے کوترقی دی جائے۔

سماجی بہبود / بے سہارا افراد کی دیکھ بھال کا نظام قائم کیا جائے۔

مہنگائی اور بے روزگاری کا خاتمہ کیا جائے۔

کھیل اور کھلاڑیوں کی سرپرستی کی جائے۔

کراچی کے ساتوں اضلاع میں ایک ایک نئے اسٹیڈیم کی تعمیر کی جائے۔