اس ماہ کے آخری دنوں میں شمالی نصف کرے (ناردن ہیمی اسفیئر) کے ممالک صبح کے وقت دو اہم اور خوبصورت سیاروں کو دیکھ سکیں گے جن میں نظامِ شمسی کا سب سے بڑی سیارہ ، مشتری (جوپیٹر) اور دوسرا سرخ سیارہ مریخ (مارس) ہے۔

واضح رہے کہ پاکستان ، بھارت اور بنگلہ دیش شمالی نصف کرے میں شامل ہیں اور یوں ہم اس فلکیاتی نظارے سے محظوظ ہوسکتے ہیں۔ اگرچہ اس وقت فجر سے کچھ دیر پہلے سیارہ مریخ دکھائی دے رہا ہے لیکن یہ 29 مئی کی صبح گویا مشتری کے بالکل قریب جاپہنچے گا۔

اگرچہ یہاں قربت کا مفہوم حقیقی معنوں میں نہ سمجھا جائے کیونکہ ان دونوں سیاروں کے درمیان اس وقت بھی 56 کروڑ کلومیٹر کا فاصلہ ہوگا۔ بس زمین سے وہ ہمیں ایک دوسرے کے قریب دکھائی دیں گے۔ اب 29 مئی کو مشتری اور مریخ اتنے قریب جاپہنچیں گے کہ ان کے درمیان ایک مکمل چودہویں کے چاند کی ٹکیہ کے برابر ہی فاصلہ رہے گا ۔ اپنی چمک کی بنا پر  یہ دونوں آسانی سے دیکھے جاسکیں گے۔

مہینے کے آخری دنوں میں چاند بھی اتررہا ہوگا اور یوں دونوں سیارے اچھی طرح دیکھیں جاسکیں گے۔ لیکن ٹھہریئے اگر آپ مشتری اور مریخ کے اوپر گراف کی طرح بلند ہوتی ہوئی ایک لکیر کھینچیں تو نظامِ شمسی کا ایک اور شاندار سیارہ آپ کے سامنے ہوگا۔ یہ سیارہ زحل (سیٹرن) ہے جو اپنے دائروں اوربہت سارے چاندوں کی وجہ سے بہت مشہور اور دلکش بھی ہے۔