پنجاب پولیس آپریشن ونگ کے ترجمان نے راوی پُل سے گِرکرجاں بحق ہونے والے پی ٹی آئی رہنما کی ہلاکت کے حوالے سے بیان جاری کردیا ہے۔

ترجمان آپریشن ونگ کے مطابق سیاسی جماعت کے کارکن فیصل کی پولیس کے ہاتھوں مبینہ ہلاکت محض ایک پروپیگنڈا ہے، سوشل میڈیا پرگردش کرنے والی خبروں میں کوئی صداقت نہیں ہے اور ان کا حقیقت سے کوئی تعلق نہیں ہے۔

ترجمان کا مزید کہنا ہے کہ فیصل نے ازخود راوی کے ایک پُل سے دوسرے پُل پرجانے کے لیے چھلانگ لگائی، اور ویڈیو میں دیکھا جاسکتا ہے کہ پُل پرپولیس کا کوئی اہل کارموجود نہیں ہے۔ فیصل پُل پرہجوم اورگرفت مضبوط نہ ہونے کی باعث دونوں پلوں کے درمیانی خلاء میں گرکرزخمی ہوا۔ اسے فوراً اسپتال منتقل کردیا گیا تھا تاہم وہ جانبر نہیں ہوسکا۔

مزید پڑھیں: لانگ مارچ میں پی ٹی آئی کے مقامی رہنما جان کی بازی ہار گئے

ترجمان آپریشنز ونگ کے مطابق متوفی فیصل کے بھائی کا بیان سے بھی اس بات کی تصدیق ہوتی ہے۔

یاد رہے کہ آج لاہور سے اسلام آباد کے لیے نکلنے والے قافلے پر پولیس کے لاٹھی چارج، آنسو گیس کی شیلنگ اور دھکم پیل کے نتیجے میں پاکستان تحریک انصاف کے سابق کونسلر فیصل جان کی بازی ہارگئے تھے۔

یہ بھی پڑھیں: کراچی میں پی ٹی آئی کے دھرنے پر پولیس کا لاٹھی چارج اور شیلنگ  

تفصیلات کے مطابق فیصل نامی کارکن کی موت مبینہ طورپرپولیس سے دھکم پیل میں راوی پل سے نیچے گرنے کے باعث ہوئی ہے۔

پارٹی ذرائع کے مطابق کارکن کی شناخت فیصل کے نام سے ہوئی جو اقبال ٹاؤن کا رہائشی تھا۔ رہنما تحریک انصاف شفقت محمود کا یہ بھی کہنا ہے کہ فیصل عباسی سابق کونسلر بھی تھے۔

شفقت محمود کا کہنا تھا کہ فیصل عباس کے قاتل شہبازشریف اوررانا ثناء اللہ ہیں، امپورٹڈ حکومت ہمارے معصوم کارکنوں کے خون کی پیاسی ہے۔

ان کا کہنا تھا کہ پی ٹی آئی کے معصوم کارکن کے والدین مریم اور شہباز شریف کو بدعائیں دے رہے ہیں۔