وزیر خارجہ بلاول بھٹو نے سیاست میں اپنے اگلے اقدام کی نشاندہی کرتے ہوئے کہا ہے کہ ہماری کوشش ہوگی کہ اگلی حکومت ہماری ہو۔

ورلڈ اکنامک فورم کے موقع پر ایک انٹرویو میں وزیر خارجہ بلاول بھٹو نے سابق وزیراعظم عمران خان کے امریکی سازش کے تمام دعوؤں کو مسترد کر دیا ہے۔

انہوں نے کہا کہ عمران خان امریکہ مخالف جذبات کو بھڑکانے کے لیے جو کچھ بھی کر سکتا ہے کر رہا ہے۔

بلاول بھٹو نے کہا کہ پاکستان میں ایسے وزرائے اعظم کی تاریخ ہے جنہیں مختلف طریقوں سے غیر جمہوری، غیر آئینی طور پر ہٹایا گیا ہے۔

انہوں نے ذوالفقار علی بھٹو کا حوالہ دیا اور کہا کہ پاکستان میں  ایک وزیراعظم  کو ہٹایا گیا اور پھانسی دی گئی اور اقتدار میں ہونے کے باوجود بھی انہیں تشدد کا نشانہ بنایا گیا۔

اس موقع پر ان کا کہنا تھا کہ اس وقت ان کی توجہ دنیا بھر میں پاکستان کی خارجہ پالیسی کے چیلنجز پر ہے۔

انہوں نے مزید کہا کہ پڑوسی ممالک اور مغرب کے ساتھ کثیرالجہتی تعاون پاکستان کے لیے آگے بڑھنے کا راستہ ہے۔

انہوں نے کہا کہ وہ اگلے انتخابات میں حصہ لیں گے اور کوشش کریں گے کہ اگلی حکومت ان کی ہو۔

بلاول بھٹو نے کہا کہ بے نظیر کا قاتل کبھی پکڑا نہیں گیا اور اقوام متحدہ کی انکوائری میں پتا چلا کہ پاکستانی حکام ان کی حفاظت یا ان کی موت کی صحیح تفتیش کرنے میں ناکام رہے ہیں۔