وفاقی تحقیقاتی ادارے ( ایف آئی اے) نے اپنی کارروائیوں کو شفاف بنانے کے لیے ایک بڑا قدم اٹھایا ہے، جس کے تحت ہر کیس پر ہونے والی کارروائی سے متعلق ڈیٹا انٹری فوری طور پر کیس مینجمنٹ سسٹم (سی ایم ایس) میں کرنا ہو گی۔

اس حوالے سے  تاخیر سے یا غلط انٹری کرنے والے ایف آئی اے اہلکاروں کے خلاف سخت تادیبی کارروائی ہو گی ۔ اس ضمن میں ڈائریکٹر جنرل ایف آئی اے نے اسٹینڈنگ آرڈر جاری کر دیا ہے ۔

سی ایم ایس کو استعمال یا مانیٹر کرنے والے تمام انویسٹی گیشن آفیسرز ( آئی اوز ) ، انکوائری آفیسرز ( ای اوز ) ، سرکل انچارجز اور زونل ڈائریکٹرز اسٹینڈنگ آرڈر پر عمل درآمد کے پابند ہوں گے جب کہ اسٹینڈنگ آرڈر کے مطابق متعلقہ سرکل انچارج اس بات کو یقینی بنائے گا کہ سی ایم ایس میں انٹریز اسی دن ہر حال میں ہوں ۔

زونل ڈائریکٹر کی طرف سے کیس / انکوائری موصول ہونے کے فورا بعد سرکل انچارج یہ کیس یا انکوائری کسی بھی تفتیش افسر کو تفویض کر سکے گا ۔ اگر تفتیشی افسر کا تبادلہ ہو جائے تو کیس یا انکوائری کسی دوسرے افسر کو منتقل ہوجائے گی لیکن نئے مقرر کردہ تفتیشی افسر کے بارے میں سرکل انچارج فوری طور پر اے ڈی جی یا ڈی جی کو آگاہ کرے گا تاکہ سی ایم ایس میں اس کا نیا ” لاگ ان ” بنایا جا سکے یا اسے اپ ڈیٹ کیا جا سکے ۔

سرکل انچارج کا تبادلہ ہونے کی صورت میں بھی زونل ڈائریکٹر فوری طور پر اے ڈی جی یا ڈی جی کو آگاہ کرے گا تاکہ اس کے مطابق سی ایم ایس میں تبدیلیاں کی جا سکیں ۔ زونل ڈائریکٹرز اس امر کے پابند ہوں گے کہ انٹریز روزانہ کی بنیاد پر درست اور بروقت کی جا رہی ہیں ۔

ایف آئی کے ذرائع نے بتایا ہے کہ اس اسٹینڈنگ آرڈر کے بعد ایف آئی اے کا کوئی اہل کار اب ڈیٹا انٹری کئے بغیر کوئی کارروائی نہیں کر سکے گا ۔ وہ غلط انٹریز بھی نہیں کر سکے گا ۔ وہ کسی کو بلیک میل کرنے کے لیے ایف آئی آر کی دھمکی دے سکے گا اور نہ ہی کال اپ نوٹس دے سکے گا کیونکہ اسے ہر کارروائی کا اپنے سسٹم میں اندراج کرنا ہو گا ۔

ذرائع کے مطابق اس سے ایف آئی اے کی کارروائیاں نہ صرف شفاف ہوں گی بلکہ کرپشن کا بھی خاتمہ ہوگا ۔ اب یہ بھی ممکن نہیں ہوگا کہ کارروائی کے بعد ایف آئی آر درج کی جا سکے ۔