اسلام آباد پولیس نے عید الفطر کے لئے سیکیورٹی انتظامات کو حتمی شکل دے دی ہے۔

تفصیلات کے مطابق عید کی چھٹیوں کے دوران 1500 سے زائد پولیس افسران و جوان سیکیورٹی کے فرائض سرانجام دیں گے، 1032 مساجد، 28 امام بارگاہوں پر نماز عید کے لئے خصوصی سیکیورٹی انتظامات کئے گئے ہیں۔

ترجمان اسلام آباد پولیس کا کہنا ہے کہ ایس ایس پی ٹریفک نماز عید کے لئے ٹریفک کی روانی اور پارکنگ کے لئے خصوصی انتطامات کریں گے، اے آئی جی اسپیشل برانچ مساجد اور امام بارگاہوں اور ملحقہ ایریاز کو مکمل سویپ کریں گے۔

پولیس ترجمان نے کہا کہ عید کی چھٹیوں کے دوران اسپیشل پٹرولنگ پلان بھی تشکیل دے دیا گیا ہے، چھٹیوں کے دوران پبلک مقامات، پارکوں اور دیگر جگہوں پر پولیس کی اضافی نفری تعینات رہے گی۔

پولیس ترجمان کے مطابق چھٹیوں کے دوران جرائم کے سدباب کے لئے سیکٹرز میں گشت اور چیکنگ میں اضافہ کردیا گیا، تمام زونل افسران کو سختی سے ہدایات ہیں کہ وہ خود اپنے علاقوں میں موجود رہیں گے۔

ترجمان اسلام آباد پولیس کا کہنا ہے کہ افسران پٹرولنگ گاڑیوں، ایگل کو گاہے بگاہے چیک کر کے بریف کریں گے، ایس ایس پی آپریشنز تمام سیکیورٹی انتطامات کی خود نگرانی کریں گے، سیف سٹی پر ایک کنٹرول روم بھی قائم کیا گیا ہے تاکہ کسی بھی ایمرجنسی میں فوری ریسپانڈ کیا جاسکے۔

ترجمان اسلام آباد پولیس کے مطابق شہریوں سے بھی گزارش ہے کہ وہ گھر خالی چھوڑتے وقت متعلقہ پولیس اسٹیشن کو اطلاع کریں، سیکٹرز کی گلیوں میں تعینات سیکیورٹی گارڈز کو بھی چیک کیا جائے گا اور بریف کیا جائے گا، اسلام آباد پولیس شہریوں کی جان و مال کے تحفظ کے لئے ہمہ وقت تیار ہے۔