سپریم کورٹ نے آغا سراج درانی کے ضمانت کیس میں وکیل سلمان اکرم راجہ کی غیر حاضری پر ایک لاکھ روپے جرمانہ عائد کردیا۔ 

تفصیلات کے مطابق سپریم کورٹ میں پیپلز پارٹی رہنما آغا سراج درانی کی ضمانت کیس کی سماعت ہوئی۔ دورانِ سماعت وکیل سلمان اکرم راجہ سماعت سے غیرحاضررہے۔

چیف جسٹس پاکستان عمرعطا بندیال نے معاون وکیل سے استفسارکیا کہ کیس میں ریمارکس دیے کہ سلمان اکرم راجہ اچھے دلائل دے رہے تھے۔

عدالت نے ریمارکس دیے کہ سلمان اکرم راجہ دلائل کے اختتام کی جانب بڑھ رہے تھے۔ سلمان اکرم راجہ کیوں پیش نہیں ہوئے۔ سلمان اکرم راجہ کی التوا کی کوئی درخواست نہیں آئی۔

معاون وکیل نے عدالت کو بتایا کہ وکیل سلمان اکرم راجہ کے دلائل تقریبا مکمل ہو گئے تھے۔

چیف جسٹس پاکستان نے کہا کہ اگر آپ سمجھتے ہیں دلائل مکمل ہو گئے تھے تو ہم فیصلہ کر دیتے ہیں۔

جسٹس عائشہ ملک نے ریمارکس دیے کہ سلمان اکرم راجہ تین چارسماعتوں سے پیش نہیں ہوئے، مقدمہ کے اختتامی مراحل پر وکیل بدلنا کیسے ممکن ہے۔

چیف جسٹس عمرعطا بندیال نے کہا کہ آغا سراج درانی نے بے تحاشہ زرعی اراضی کے باوجود 1990 تک ایک گھر بنایا۔ 2008 کے بعد آغا سراج درانی نے بے تحاشا پراپرٹیز کیسے بنائی۔

چیف جسٹس کی سربراہی میں تین رکنی بینچ نے سماعت غیر معینہ مدت کیلئے ملتوی کردی۔