بل گیٹس برسوں تک دنیا کے امیر ترین شخص رہے اور اب بھی بلومبرگ بلین ایئر انڈیکس کے مطابق 116 ارب ڈالرز کے ساتھ دنیا کے چوتھے امیر ترین فرد ہیں۔

تاہم اکثر لوگ ان کی پسند ناپسند کے بارے میں جاننا چاہتے ہیں خاص طور ہر یہ کہ بل گیٹس کونسا موبائل فون استعمال کرتے ہیں آئی فون یا اینڈرائیڈ تو آیئے ہم آپ کو اس کا جواب بتاتے ہیں۔

یہ تو سب ہی جانتے ہیں کہ اب مائیکرو سافٹ بھی سرفیس ڈو اور سرفیس 2 اینڈرائیڈ اسمارٹ فون فروخت کررہی ہے اور بل گیٹس نے ہی اس کمپنی کی بنیاد رکھی تھی۔

تاہم ایک وقت تھا جب بل گیٹس کے پاس 2 فونز تھے ایک آئی فون اور ایک اینڈرائیڈ اسمارٹ فون، مگر اب ایسا نہیں اور اب وہ ایک فون ہی استعمال کررہے ہیں۔

رپورٹ کے مطابق بِل گیٹس اب آئی فون پسند نہیں کرتے بلکہ وہ اینڈرائیڈ آپریٹنگ سسٹم کو ترجیح دیتے ہیں جس کی وجہ اس میں بہت زیادہ تعداد میں ایپس کی موجودگی ہے۔

حال ہی میں انہوں نے بتایا کہ وہ کس کمپنی کے تیار کردہ اسمارٹ فون کو روزمرہ میں استعمال کرنا پسند کرتے ہیں اور وہ ایک فولڈ ایبل فون ہے۔

سوشل میڈیا سائٹ ریڈیٹ میں سوالات کے ایک سیشن کے دوران بل گیٹس نے بتایا کہ وہ سام سنگ کے گلیکسی زی فولڈ 3 کو استعمال کررہے ہیں۔

انہوں نے کہا کہ وہ مختلف فونز کو آزما چکے ہیں مگر گلیکسی زی فولڈ 3 کے انتخاب کی وجہ یہ ہے کہ اب انہیں زیادہ ڈیوائسز اپنے ساتھ رکھنے کی ضرورت نہیں بلکہ یہ فون اور ایک پورٹ ایبل پی سی کی طرح ہے جو ہر وقت ان کے ساتھ ہوتا ہے۔

یہاں دلچسپ بات یہ ہے کہ مائیکرو سافٹ کا سرفیس ڈو 2 بھی ایک طرح کا فولڈ ایبل فون ہے مگر پھر بھی بل گیٹس سام سنگ کے تیار کردہ فون کو ترجیح دے رہے ہیں۔