بھارت اور جنوبی افریقہ کے درمیان آنے والی سیریز میں بائیو سیکیور ببل پابندیاں نہیں ہوں گی، اس کی تصدیق بی سی سی آئی کے سیکرٹری جے شاہ نے کی ہے۔

تفصیلات کے مطابق یہ دو سالوں میں پہلی بین الاقوامی سیریز ہوگی جہاں  بھارتی کھلاڑیوں کے لیے کوئی بایو سیکیور  ببل نہیں ہوگا۔

بی سی سی آئی کے سیکرٹری نے کہا کہ  کھلاڑیوں کو ہوٹل کے بائیو ببل کے اندر خاندان جیسا ماحول ملا، آئی پی ایل کے معاملے میں ہمارے پاس ہر ٹیم کے لیے مخصوص ہوٹل تھے، پورا ٹورنامنٹ ایک جگہ منعقد ہوا تمام ٹیموں کے پاس اپنے لاؤنجز، تفریحی مراکزتھے، لہذا انہوں نے بھی لطف اٹھایا۔

واضح رہے کہ دونوں ٹیموں کے درمیان  پانچ میچوں کی ٹی ٹوئنٹی  سیریز 9 جون سے شروع ہونے والی ہے اور یہ 19 جون تک چلے گی۔

 کے ایل راہول  بھارتی ٹیم کی قیادت کریں گے جب کہ دنیش کارتک اور ہاردک پانڈیا ٹیم میں واپس آئے ہیں۔

دوسری جانب ویرات کوہلی، روہت شرما اور جسپریت بمراہ کو آرام دیا گیا ہے۔

بھارتی ٹیم میں کے ایل راہول (کپتان)، رتوراج گائیکواڑ، ایشان کشن، دیپک ہوڈا، شریاس آئیر، رشبھ پنت ( نائب کپتان)، دنیش کارتک (وکٹ کیپر)، ہاردک پانڈیا، وینکٹیش آئیر، یوزویندر چہل، کلدیپ یادو، اکسر پٹیل، روی بنو ، بھونیشور کمار، ہرشل پٹیل، اویش خان، ارشدیپ سنگھ عمران ملک شامل ہیں۔