نیب قوانین میں ترمیم کومسترد کرتے ہیں، اوورسیزپاکستانیوں کو ووٹ کے حق سے محروم کرنا سراسرزیادتی ہے، جب کہ پیٹرول کی قیمت میں اضافہ عوام پرخود کش حملہ ہے۔

ان خیالات کا اظہارامیرجماعت اسلامی سراج الحق نے منصورہ میں پریس کانفرنس سے خطاب میں کیا۔

انہوں نے پیٹرولیم مصنوعات کی قیمتوں میں ہوشربا اضافے کو حکومت کی جانب سے عوام پرخودکش حملہ قراردیتے ہوئے کہا کہ قیمتوں میں اضافے کے خلاف اتوارکوملک گیراحتجاج کیا جائے گا۔

امیرجماعت اسلامی نے کہا کہ موجودہ حکومت نے جس طرح قانون سازی کی، اس سے پاکستان تحریک انصاف حکومت کی یاد تازہ ہو گئی۔ سابقہ حکومت نے 10منٹ میں قومی اسمبلی سے 35 قوانین پاس کرائے تھے۔

انہوں نے کہا کہ نیب پرہتھوڑاچلا کرملک میں احتساب کے بچے کھچے نظام کوبھی ختم کردیا گیا۔ اوورسیزپاکستانیوں کو ووٹ کے حق سے محروم کرنا سراسر زیادتی ہے۔ جماعت اسلامی جلد بازی میں متعارف کرائے گئے یک طرفہ قوانین کومسترد کرتی ہے۔

سراج الحق نے مزید کہا کہ انتخابات کے مروجہ نظام کی بجائے متناسب نمائندگی کا اصول اپنایا جائے۔ ہم چاہتے ہیں کہ عدلیہ اورالیکشن کمیشن مکمل آزاد اوراسٹیبلشمنٹ نیوٹرل رہے۔

امیرجماعت اسلامی نے حکومت سے مطالبہ کیا کہ وہ وفاقی شرعی عدالت کے احکامات کی روشنی میں سود سے پاک بجٹ پیش کرے، جماعت اسلامی واحد جماعت ہے جوحقیقی اپوزیشن کا کردار ادا کر رہی ہے۔