گوجرانوالہ میں 18 مئی کو پی ٹی آئی کے پاور شو کیلئے تیاریاں زور و شور سے جاری ہیں۔

تفصیلات کے مطابق پاکستان تحریک انصاف کے چیئر مین اور سابق وزیراعظم عمران خان اپنے خلاف تحریک عدم اعتماد کامیاب ہونے کے بعد ملک بھر میں جلسے کر رہے ہیں۔

گوجرانوالہ میں 18 مئی کو پی ٹی آئی کے چیئرمین عمران خان ایک بڑے جلسہ عام سے خطاب کریں گے جس کیلئے جناح اسٹیڈیم میں انتظامات جاری ہیں۔

قائدین کے لئے 80 فٹ چوڑا اور 30 فٹ اونچا اسٹیج تیار کیا جا رہا ہے جبکہ کپتان کے جلسہ کے حوالے سے کھلاڑیوں میں بھرپور جوش و خروش پایا جا رہا ہے۔

کارکن بڑی تعداد میں جناح اسٹیڈیم میں جمع ہو کر شدید نعرے بازی بھی کر رہے ہیں جبکہ خواتین کی بڑی تعداد بھی بچوں کے ہمراہ اسٹیڈیم میں موجود ہے۔

 شہر بھر میں پی ٹی آئی کی جانب سے ریلیاں نکالی جا رہی ہیں جو جی ٹی روڈ سے ہوتی ہوئی جناح اسٹیڈیم پہنچیں گی۔

دوسری جانب پاکستان تحریک انصاف کے پے در پے جلسوں کے بعد پاکستان مسلم لیگ بھی سیاسی پاور شو کے لیے متحرک ہو گئی ہے۔

اٹک، صوابی، گجرات کے بعد سرگودھا میں بھی عوامی طاقت کا مظاہرہ کے لیے حکمران جماعت تیار ہو گئی۔

 اس جلسے میں پاکستان مسلم لیگ ن کی نائب صدر مریم نواز اور میاں محمد حمزہ شہباز شریف سمیت دیگر سینئر رہنما شرکت کریں گے۔