وزیراعلیٰ خیبر پختونخوا نے کہا ہے کہ ترقیاتی منصوبوں کی تکمیل کے لئے مقرر کردہ ڈیڈ لائن میں ایک دن کی بھی تاخیر برداشت نہیں۔

 وزیراعلیٰ خیبر پختونخوا محمود خان کی زیر صدارت اعلی سطح کا اجلاس ہوا جس میں مختلف محکموں کے تحت صوبہ بھر میں جاری ترقیاتی منصوبوں پر پیشرفت کا جائزہ لیا گیا۔

ایڈیشنل چیف سیکرٹری اور وزیراعلیٰ کے پرنسپل سیکرٹری کے علاوہ صوبائی محکموں کے انتظامی سیکرٹریوں نے شرکت کی۔

اجلاس کی صدارت کرتے ہوئے محمود خان نے کہا کہ ترقیاتی منصوبوں کی تکمیل کے لئے مقرر کردہ ڈیڈ لائن میں ایک دن کی بھی تاخیر برداشت نہیں، مالی سال کے اختتام تک ت جاری شدہ ترقیاتی فنڈز کے سو فیصد استعمال کو ہر صورت یقینی بنایا جائے،ترقیاتی فنڈز لیپس ہونے کی صورت میں متعلقہ سیکرٹری ذمہ دار ہوگا۔

محمود خان کا کہنا تھا کہ محکمے اگلے سالانہ ترقیاتی پروگرام کی تیاری پر خصوصی توجہ دی، انتظامی سیکرٹریز اگلے سالانہ ترقیاتی پروگرام کی تیاری کے لئے اجلاسوں میں اپنی شرکت کو یقینی بنائیں۔

ان کا یہ بھی کہنا تھا کہ اگلے ترقیاتی پروگرام میں جاری منصوبوں کی تکمیل کو ترجیح دی جائے جبکہ بعض منصوبوں پر عملدرآمد کی رفتار تسلی بخش نہیں،  متعلقہ سیکرٹریز ان منصوبوں پر ٹھوس پیشرفت یقینی بنائیں،اگلے پندرہ دنوں میں ان منصوبوں پر پیشرفت کا جائزہ لینے کے لئے دوبارہ اجلاس منعقد کیا جائے گا۔

محمود خان نے کہا کہ متعلقہ سیکرٹریز ان منصوبوں پر ٹھوس پیشرفت سے آگاہ کریں، نئے منصوبوں کی زمینوں کے لئے جاری شدہ فنڈز جلد سے جلد زمین مالکان کو ادا کئے جائیں۔

وزیر اعلیٰ خیبر پختونخوا محمود خان نے مزید کہا کہ سٹیزن فیسیلیٹیشن سنٹرز کے قیام کے لئے ایک ہفتے کے اندر موزوں جہگوں کی نشاندہی کی جائے جبکہ ورسک روڈ پشاور پر قائم ماربل فیکٹریوں کو مہنمد اکنامک زون منتقلی کے لئے پندرہ دنوں میں لائحہ عمل تیار کیا جائے۔