چوہدری پرویز الہٰی نے کہا ہے کہ نیت ٹھیک ہو تو ہر کام میں اللہ کی برکت شامل ہو جاتی ہے۔

اسپیکر پنجاب اسمبلی چوہدری پرویز الہٰی نے کہا ہے کہ ضمانتوں پر بننے والی حکومت کے کوئی پاؤں نہیں ہیں، ان کے پاؤں جلد اکھڑ جائیں گے یہ جہاں سے آئے ہیں وہاں واپس جائیں گے۔

انہوں نے کہا کہ میری دعا ہے کہ عمران خان کی قیادت میں پاکستان کو عالم اسلام میں وہ مقام ملے جو پاکستان حاصل نہیں کر سکا، نیت ٹھیک ہو تو ہر کام میں اللہ کی برکت شامل ہو جاتی ہے۔

چوہدری پرویز الہٰی نے کہا ہے کہ اللہ تعالیٰ پاکستان کو اقوام عالم میں ممتاز مقام عطا فرمائے، اللہ کریم پاکستانی قوم کو عید کی ڈھیروں خوشیاں عطا فرمائے۔

اسپیکر پنجاب اسمبلی نے کہا ہے کہ بیرونی سازش اور مداخلت سے بننے والی حکومت کا کوئی مستقبل نہیں، بیرونی سازش اورمداخلت کے اعتراف امریکہ سے بھی سامنے آرہے ہیں۔

انہوں نے کہا کہ منحرف ارکان کے بل بوتے پر بننے والی حکومت کسی وقت بھی گر سکتی ہے، پنجاب میں پچیس منحرف ارکان کے ریفرنس میں نااہلی نوشتہ دیوار ہے، امیدہے الیکشن کمیشن ضمیر بیچنے والوں کو جلد از جلد نااہل کرے گا۔

دوسری جانب مونس الہٰی نے کہا ہے کہ سازش کے ذریعے اقتدار میں آنے والے ڈیلیور کرنے کی صلاحیت نہیں رکھتے، عمران خان کو قوم کی بھرپور تائید ہے، ان کی ہر کال پر عوام باہر نکل رہے ہیں۔

انہوں نے کہا کہ لانگ مارچ کی کال کو بھی عوامی حلقوں نے خوش آمدید کہا ہے، تحریک انصاف اور پاکستان مسلم لیگ ہم قدم ہوکر عوام کی آواز بلند کررہے ہیں، پنجاب میں غیر آئینی و غیر قانونی حکمرانوں کا ڈراپ سین جلد ہوگا۔

مونس الہٰی نے کہا ہے کہ پنجاب پولیس اور انتظامیہ کے ذریعے جعلی حلف اوراقتدار قوم کو قبول نہیں، عمران خان نے ہمیشہ ملک اور قوم کے حقیقی ایشوز پر آواز بلند کی۔