نیپال کے علاقے پوکھرا سے نجی ائیر لائن تارا ائیر کا چھوٹا مسافر طیارہ کونگ گاؤں میں گر کر تباہ ہو گیا۔

حکام کے مطابق طیارے میں 22 مسافر سوار تھے، جس میں 13 نیپالی، دو جرمن ، چار بھارتی اور عملے کے تین ارکان شامل ہیں۔

بھارتی میڈیا کے مطابق تارا ایئر کے طیارے نے پوکھرا سے صبح 9.55 بجے اڑان بھری اور 15 منٹ بعد کنٹرول ٹاور سے رابطہ منقطع ہو گیا، ایئر لائن کے ترجمان کے مطابق گر کر تباہ ہونے والا طیارہ بعد میں کوانگ گاؤں سے ملا۔

مقامی لوگوں کی طرف سے دی گئی معلومات کے مطابق، تارا ایئر کا طیارہ مناپتی ہمال کے لینڈ سلائیڈنگ کے نیچے لامچے ندی میں گر کر تباہ ہو گیا۔

فوج کے ترجمان نارائن سلوال کا کہنا ہے کہ نیپالی فوج زمینی اور فضائی راستے سے جائے وقوع کی طرف بڑھ رہی ہے.

طیارے کو صبح 10 بج کر 15 منٹ پر مغربی پہاڑی علاقے جومسوم ہوائی اڈے پر اترنا تھا۔

ایوی ایشن ذرائع نے بتایا کہ طیارہ کا پوکھرا جومسوم ہوائی راستے پر گھوریپانی کے اوپر آسمان سے ٹاور سے رابطہ منقطع ہوگیا۔

جومسوم ہوائی اڈے کے ایک ایئر ٹریفک کنٹرولر کے مطابق، ان کے پاس جومسوم کے علاقے میں تیز آواز کے بارے میں غیر مصدقہ اطلاع ہے۔

میڈیا رپورٹس کے مطابق ابھی تک حادثے کے بعد طیارے میں سوار افراد کے حوالے سے کوئی اطلاع نہیں ہے۔