انگلینڈ کے سابق کرکٹر مائیکل وان نے گیری کرسٹن کی جگہ برینڈن میک کولم کو انگلینڈ کا نیا ٹیسٹ کوچ بنائے جانے پر تشویش کا اظہار کیا ہے۔

تفصیلات کے مطابق انگلینڈ اینڈ ویلز کرکٹ بورڈ (ای سی بی) نے نیوزی لینڈ کے سابق کپتان برینڈن میک کولم کو انگلینڈ کا نیا ٹیسٹ کوچ مقرر کرنے کا اعلان کر دیا۔

 فی الحال آئی پی ایل میں کولکتہ نائٹ رائیڈرز (کے کے آر) کے ساتھ منسلک، میک کولم اس ماہ کے آخر میں اپنے ہی ملک نیوزی لینڈ کے خلاف اپنی پہلی اسائنمنٹ کے لیے انگلش ٹیم میں شامل ہوں گے ۔

مائیکل وان کا کہنا تھا کہ انگلینڈ کی جانب سے برینڈن میک کولم کی جرات مندانہ تقرری مجھے بے چین کرتی ہے، اگر انگلش کرکٹ نے گیری کرسٹن جیسے کسی کو دوسری بار نظر انداز کیا ہے تو مجھے یہ ناقابل یقین حد تک عجیب لگتا ہے۔

یہ بھی پڑھیں:برینڈن میک کولم انگلش ٹیم کے کوچ مقرر

مائیکل وان نے کرسٹن کی تعریف کرتے ہوئے کہا کہ وہ تجربہ کار ہیں اور اس کردار کے لیے موزوں ہیں، ایشز میں انگلینڈ کی تباہ کن کارکردگی کے بعد ذمے داری کسی زیادہ تجربہ کار کو سونپی جانی چاہیے تھی۔

ان کا کہنا تھا کہ برینڈن میک کولم ایک بڑا نام ہے لیکن ان کی تقرری سے خطرہ بھی ہے۔

مائیکل وان نے مزید کہا کہ برینڈن میک کولم کو ہم سب کے لیے بڑے پیمانے پر بہتری دیکھنے کے لیے بہت کچھ نہیں کرنا پڑے گا لیکن اگر یہ تیزی سے نہیں ہوا تو پھر ان کی تقرری کے بارے میں سوالات پوچھے جائیں گے۔