سابق گورنر پنجاب عمر سرفراز چیمہ نے کہا ہے کہ سابق وزیراعلیٰ پنجاب عثمان بزدار کا استعفیٰ ہی غلط ہے۔

سابق گورنر عمر سرفراز چیمہ نے اسلام آباد ہائی کورٹ کے احاطے میں میڈیا سے گفتگو کرتے ہوئے کہا کہ استعفیٰ دینے اور قبول کرنے والے کو دیکھنا چاہیے تھا کہ  آئینی ہے یا نہیں۔

انہوں نے کہا کہ عدالتی کارروائی کے بعد ہی وزیراعلیٰ کے دفتر پر قبضہ کیا گیا جبکہ ایڈوکیٹ جنرل پنجاب  کی رپورٹ کے مطابق  عثمان بزدار کا استعفیٰ ایک ردی کے ٹکرے کے برابر ہے ۔

انہوں نے کہا کہ عید سے پہلے وزیر اعلیٰ سے زبردستی اختیارات لیے گئے اور اب عدالت سے بھی یہی استدعا ہے کہ عدالتی حکم  کالعدم قرار دے۔

خیال رہے کہ اسلام آباد ہائی کورٹ میں عمر سرفراز چیمہ کی بطور گورنر عہدے سے برطرفی کے خلاف درخواست پر سماعت ہوئی۔

اسلام آباد ہائیکورٹ نے عمر چیمہ کی درخواست پر رجسٹرار آفس کے اعتراضات ختم کرتے ہوئے سماعت کے لیے لارجر بینچ تشکیل دیا جس کے بعد کیس کی سماعت منگل تک ملتوی کردی گئی۔

دوسری جانب لاہور ہائی کورٹ میں وزیراعلیٰ پنجاب حمزہ شہباز کو عہدے سے ہٹانے اور نئے الیکشن کروانے کی درخواست پر سماعت ہوئی جس میں استدعا کی گئی کہ حمزہ شہباز کا بطور وزیر اعلیٰ حلف کالعدم قرار دیا جائے۔

سماعت کے دوران عدالت نے فریقین کو نوٹس جاری کر کے 25 مئی کو جواب طلب کر لیا۔