جعلی پینشن کے اجرا کے اسکینڈل کیس میں اہم شخصیت کے دست راست ملزم سےتحقیقات میں اہم انکشافات سامنے آ گئے۔ 

تفصیلات کے مطابق کراچی کی احتساب عدالت میں جعلی پینشن کے اجرا کے اسکینڈل سے متعلق کیس کی سماعت ہوئی  جس میں ڈائریکٹر پلاننگ اینڈ ڈویلپمنٹ عامراسراں کے خلاف انکوائری میں نیب نے تحقیقات میں پیش رفت سے متعلق رپورٹ عدالت میں جمع کرادی۔

نیب نے رپورٹ میں عدالت کو بتایا کہ ملزم عامراسراں کو 24 اپریل کو امریکا سے واپسی پر جناح ائیرپورٹ سے گرفتار کیا تھا۔

رپورٹ میں کہا گیا کہ ملزم عامرڈی ڈی او فنانس وزیر اعلی ہاؤس تعینات رہا ہے۔ ملزم دس سال زائد کے عرصہ میں فنانس ڈیپارٹمنٹ میں تعینات رہا ہے۔

رپورٹ میں نیب نے عدالت کو بتایا کہ ملزم نے انکشاف کیا ہے کہ اعلی حکام کے کہنے پر کئی لوگوں کو فائدہ پہنچایا ہے۔ ملزم کے جائیداد اس کی آمدنی سے مطابقت نہیں رکھتی ہے۔ ملزم عامرکے پاس دادو اور لاڑکانہ میں 225 ایکڑ زمین ہے۔

نیب رپورٹ میں یہ بھی کہا گیا ہے کہ ملزم کے پاس بخاری کمرشل پرفلیٹ ہے۔ ملزم کے ذاتی اکاوئنٹس سے 119 ملین روپے کی ٹرانزیکشن ہوئی ہے۔ ملزم سے کراچی ائیرپورٹ پر تین سوٹ کیس برآمد ہوئے ہیں۔ ملزم کے قبضے سے موبائل فونز، غیر ملکی کرنسی سمیت متعدد اشیاء برآمد ہوئی ہیں۔

رپورٹ میں کہا گیا کہ فیک پینشن اسکینڈل میں ریفرنس دائر کردیا گیا ہے۔ ملزم کے خلاف ضمنی ریفرنس دائر کیا جائے گا۔

عدالت نے ملزم عامراسراں کے جسمانی ریمانڈ میں 31 مئی تک  توسیع کردی۔

دوسری جانب کراچی کی احتساب عدالت میں محکمہ اطلاعات میں غیرقانونی بھرتیوں سے متعلق نیب انکوئری کیس میں سابق وزیراعلی سندھ قائم علی شاہ عدالت میں پیش ہوئے۔

عدالت نے قائم علی شاہ کی ضمانت میں 20 جولائی تک توسیع کردی۔

نیب کے مطابق قائم علی شاہ و دیگر کے خلاف 40 سے زائد غیر قانونی بھرتیوں کا الزام ہے۔ قائم علی شاہ و دیگر کے خلاف نیب انکوئری جاری ہے۔