وزیر اعظم شہباز شریف نے ترکی کے ساتھ دوطرفہ تجارت کو بڑھانے کے لیے کام کرنے کی یقین دہانی کراتے ہوئے اپنے ملک کو خود انحصاری اور سیاسی طور پر مستحکم بنانے کے عزم اظہار کیا ہے۔

وزیراعظم شہباز شریف نے ایک خصوصی انٹرویو میں بتایا کہ پاکستان اور ترکی کے تعلقات مثالی ہیں۔

انہوں نے کہا کہ یہ تاریخی تعلقات مشترکہ مذہبی، ثقافتی اور لسانی روابط پر مضبوطی سے قائم ہیں اور دونوں طرف سے سیاسی تبدیلیوں سے بالاتر ہیں۔

انہوں نے بتایا کہ اس سال دونوں ممالک سفارتی تعلقات کے قیام کی 75ویں سالگرہ منا رہے ہیں اور ان ساڑھے سات دہائیوں میں، دونوں فریق ہر طرح کی تبدیلیوں میں ہمیشہ ایک دوسرے کے شانہ بشانہ کھڑے رہے ہیں۔

وزیراعظم کا کہنا تھا کہ پاکستان اور ترکی بنیادی قومی مفاد کے تمام مسائل پر ایک دوسرے کی حمایت کرتے ہیں۔

شہباز شریف نے کہا کہ اب ہم اقتصادی تعاون پر توجہ دے رہے ہیں۔ انہوں نے پاک ترکی دوطرفہ تعلقات کو فروغ دینے کے عزم کا اظہار کیا ہے۔

اس موقع پر انہوں نے بتایا کہ دورہ ترکی کے دوران وہ  کاروباری شخصیات اور سرمایہ کارکمپنیوں کے نمائندوں سے ملاقات کریں گے اور پاکستان میں مختلف شعبوں میں سرمایہ کاری کی دعوت بھیں دیں گے۔

ان کا کہنا تھا کہ پاکستان اور ترکی کے درمیان تجارتی حجم بڑھانے کے وسیع امکانات موجود ہیں۔

امریکہ کے ساتھ تعلقات:

وزیراعظم نے کہا کہ پاکستان نے موسمیاتی تبدیلی، صحت، توانائی، تجارت اور سرمایہ کاری سمیت مختلف شعبوں میں امریکہ کے ساتھ مذاکرات شروع کیے ہیں جو پاکستان اور امریکہ کے درمیان دوطرفہ تعلقات کو مضبوط بنانے میں اہم کردار ادا کر رہے ہیں۔

انہوں نے کہا کہ پاکستان اور امریکہ کے درمیان باہمی دلچسپی کے مختلف شعبوں میں دیرینہ اور وسیع البنیاد تعلقات ہیں اور ہم امریکہ کے ساتھ اپنے تعلقات کو گہرا کرنے کے خواہشمند ہیں۔

سی پیک کے متعلق اظہار خیال:

 وزیراعظم نے کہا کہ جہاں پاکستان امریکہ کے ساتھ تعلقات کو گہرا اور وسیع کرنا چاہتا ہے، وہیں اس کی توجہ چین پاکستان اقتصادی راہداری کے تحت بنیادی ڈھانچے کی تعمیر پر بھی ہے۔