وفاقی وزیر صحت عبدالقادر پٹیل نے کہا ہے کہ پاکستان میں سگریٹ نوشی صحت عامہ کا ایک بڑا چیلنج بنی ہوئی ہے جس سے سالانہ 163,500 ہلاکتیں ہو جاتی ہیں۔

وفاقی وزیر صحت عبدالقادر پٹیل کی جانب سے سگریٹ نوشی کی روک تھام کے عالمی دن کے موقع پر پیغام جاری کیا گیا ہے۔

انہوں نے کہا کہ دنیا بھر کی طرح پاکستان میں بھی سگریٹ نوشی کی روک تھام کا عالمی دن 31 مئی کو منایا جا رہا ہے، جس  کا مرکزی موضوع “تمباکو: ہمارے ماحول کے لیے خطرہ” ہے۔

عبدالقادر پٹیل نے کہا کہ اس دن کو منانے کا مقصد تمباکواور سگریٹ نوشی کے استعمال سے خطرات کی نشاندہی کرنا ہے۔

ان کا کہنا تھا کہ مہم کا مقصد تمباکو کے ماحولیاتی اثرات کے بارے میں عوام میں شعور و آگاہی پیدا کرنا ہے ۔

انہوں نے کہا کہ سگریٹ نوشی کی عالمی وبا سے ہر سال دنیا بھر میں تقریباً 80 لاکھ افراد ہلاک ہو جاتے ہیں اور ان میں سے 70 لاکھ سے زائد ہلاکتیں سگریٹ کے براہ راست استعمال سے ہوتی ہیں۔

ان کا کہنا تھا کہ  6 سے 15 سال کی عمر کے 1200 پاکستانی بچے روزانہ سگریٹ نوشی شروع کر دیتے ہیں، موجودہ حکومت  سگریٹ نوشی سے بچانے کی مربوط حکمت عملی پر عمل درامد کو یقینی بنارہی ہے۔

وفاقی وزیر صحت نے کہا کہ سگریٹ نوشی پر قابو پانے کیلئے صوبوں کے ساتھ ملکر قومی پالیسی تیار کی ہے اور ان کے اشتہارات، پروموشنز اور اسپانسرشپ اور متعلقہ مصنوعات کی تمام اقسام پر پابندی ہے۔

حکومت نے سگریٹ کے پیکٹ پر 60 فیصد  گرافک ہیلتھ وارننگ نافذ کر رکھی ہے اور اور 18 سال سے کم عمر افراد کو سگریٹ کی فروخت پر پابندی ہے۔

 عبدالقادر پٹیل  نے کہا کہ مشرقی بحیرہ روم کے خطے میں پاکستان واحد ملک ہو گا جو 2025 تک سگریٹ نوشی میں 30 فیصد تک کمی لانے کا ہدف حاصل کر لے گا ۔

 ان کا کہنا تھا کہ گزشتہ سال ہی مشرقی بحیرہ روم  میں موثر اقدامات پر سگریٹ نوشی کی روک تھام کے عالمی دن پرپاکستان کی وزارت صحت کو عالمی ادارہ صحت کاایوارڈ ملا تھا۔

 انہوں نے کہا کہ حکومت ٹیکسوں میں اضافے، گرافک ہیلتھ وارننگز کے سائز کو بڑھانے اور انسداد مارکیٹنگ مہم، نکوٹین کے استعمال کے خلاف آگاہی دینے جیسے اقدامات کرے گی۔