وزیراعلیٰ بلوچستان میر عبدالقدوس بزنجو کے خلاف تحریک عدم اعتماد بلوچستان اسمبلی کے آج ہونے والے اجلاس میں پیش کی گئی تاہم تحریک عدم اعتماد پیش کرنے والے ارکان اسمبلی کی اکثریت حاصل کرنے میں ناکام رہے جس کے سبب یہ تحریک ناکام ہوگئی۔

بلوچستان اسمبلی کے خصوصی اجلاس کے دوران محرک نے عدم اعتماد کی تحریک پیش کی جس پر 14 اراکین کے دستخط موجود تھے۔ اسمبلی قوائد کے مطابق اس قرار داد کو ایوان میں پیش کرنے کیلئے محرک کو 65 میں سے 13اراکین اسمبلی کی حمایت درکار ہوتی ہے لیکن جام کمال گروپ اسمبلی میں 13 ممبران  کی تعداد پوری نہیں کرسکی۔

بلوچستان اسمبلی میں 11 اراکین نے تحریک عدم اعتماد کی حمایت کی۔ آئین کے تحت 20 فیصد ممبران یعنی 13 اراکین کی اجازت سے اسمبلی میں قرار داد پیش کی جا سکتی ہے لہذا ممبران پورا نہ ہونے پر وزیراعلیٰ بلوچستان عبدالقدوس بزنجو کے خلاف عدم اعتماد ناکام ہوگئی۔

آئین کے مطابق آئندہ 6 ماہ تک وزیراعلیٰ بلوچستان عبدالقدوس بزنجو کے خلاف عدم اعتماد کی تحریک نہیں لائی جاسکتی ہے۔ بعد ازاں بلوچستان اسمبلی کا اجلاس غیر معینہ مدت کے لیے ملتوی کر دیا گیا۔

خیال رہے کہ بلوچستان کی 49 سالہ پارلیمانی تاریخ میں صرف ایک وزیراعلیٰ نے پانچ سالہ آئینی مدت پوری کی ہے جب کہ میرعبدالقدوس پانچویں وزیر اعلیٰ ہیں جنہیں تحریک عدم اعتماد کا سامنا ہے اور بیشتر وزرائے اعلیٰ نے تحریک عدم اعتماد کا سامنے کرنے کی بجائے مستعفی ہونے کا ترجیح دی۔

میر تاج محمد جمالی، سردار اختر جان مینگل، نواب ثنا اللہ زہری اور جام کمال کے بعد میر عبدالقدوس بزنجو نے تحریک عدم اعتماد کا سامنا کیا۔

ذرائع کے مطابق بلوچستان عوامی پارٹی (بی اے پی) کی جانب سے وفاقی حکومت کی حمایت واپس لینے پر غور کیا جارہا ہے۔