عاصم افتخار نے کہا ہے کہ پاکستان حریت رہنما یاسین ملک کی سزا کے خلاف تمام ممکنہ اقدامات کرے گا۔

ترجمان دفتر خارجہ عاصم افتخار احمد نے ہفتہ وار میڈیا بریفنگ دیتے ہوئے کہا کہ پاکستان کی جانب سے حریت رہنما محمد یاسین ملک کو من گھڑت الزامات پر بھارتی عدالت سے سزا کی شدید مذمت کرتے ہیں۔

انہوں نے کہا کہ ہندوستان نے عالمی انسانی حقوق قوانین کی کھلی خلاف ورزی کی، وزیر خارجہ نے اقوام متحدہ انسانی حقوق کمشنر اور او آئی سی سیکرٹری جنرل کو خطوط ارسال کیے ہیں۔

عاصم افتخار نے کہا ہے کہ پاکستان کشمیری قیادت اور عوام کے خلاف انسانی حقوق کی سنگین خلاف ورزیوں کے خلاف آواز اٹھاتا رہے گا، وزیر خارجہ بلاول بھٹو زرداری نے 23 سے 26 مئی تک سوئٹزرلینڈ کا دورہ کیا، وزیر مملکت خارجہ امور حنا ربانی کھر بھی ان کے ہمراہ تھیں۔

ترجمان دفتر خارجہ نے کہا کہ وزیر خارجہ بلاول نے چینی ہم منصب وانگ ژی کی دعوت پر چین کا پہلا دورہ کیا، بھارتی حکومت کی جعلی کارروائیوں سےکشمیری تحریک آزادی کی جدوجہد کمزور نہیں ہو گی۔

انہوں نے کہا کہ بھارت کے 5 اگست 2019 کے غاصبانہ اقدامات کے بعد کشمیریوں کی جدوجہد تیز ہوئی، پاکستان نے کسی معاملے پر پہلو تہی نہیں کی، ہمیشہ سفارتی سطح پر معاملہ اٹھایا۔

عاصم افتخار نے کہا ہے کہ پاکستان نے کشمیر کا معاملہ اقوام متحدہ، او آئی سی، عالمی فورمز، اہم ممالک کے دارالحکومتوں میں اٹھایا، پاکستان جلد کشمیری کے ساتھ ہونے والی بربریت کا معاملہ انسانی حقوق کونسل میں اٹھائے گا۔

ترجمان دفتر خارجہ نے کہا کہ بھارتی حکومت کی طرف سے اس طرح کے ہتھکنڈوں سے تحریک آزادی کشمیر پر کوئی منفی اثرات مرتب نہیں ہونگے، مقبوضہ کشمیر میں بھارتی مظالم سے تحریک کمزور ہونے کے بجائے مضبوط ہو گی۔

انہوں نے کہا کہ وزیر خارجہ اقوام متحدہ کے سیکریٹری جنرل کو مراسلہ لکھ رہے ہیں، پاکستان حریت رہنما یاسین ملک کی سزا کے خلاف تمام ممکنہ اقدامات کرے گا۔