ترجمان دفتر خارجہ نے کہا ہے کہ پاکستانی امن دستے عالمی امن کے لیے ملک کے ثابت قدم عزم کی مثال ہیں۔

ترجمان دفتر خارجہ عاصم افتخار احمد نے اپنے ایک بیان میں کہا کہ پاکستان اقوام متحدہ کے امن دستوں کا عالمی دن منانے میں عالمی برادری کے ساتھ شامل ہے۔

انہوں نے کہا کہ پاکستان اقوام متحدہ کے امن مشن میں سب سے زیادہ فوجی تعاون کرنے والے ممالک میں سے ایک ہے۔

عاصم افتخار احمد نے یہ بھی کہا کہ پاکستان دنیا کے کئی ایک تنازعات سے متاثرہ علاقوں میں سلامتی اور استحکام کو برقرار رکھنے میں “بلیو ہیلمٹ” کے اہم کردار کی قدر کرتا ہے۔

ترجمان دفتر خارجہ کا کہنا تھا کہ ہم اقوام متحدہ کی امن فوج کی دینا بھر میں خدمات اور قربانیوں کو سلام پیش کرتے ہیں، ہم امن، استحکام اور تعاون کے مشترکہ نظریات کو آگے بڑھانے کے لیے اقوام متحدہ کے ساتھ کام جاری رکھنے کے اپنے عزم کا اعادہ کرتے ہیں۔

ان کا یہ بھی کہنا تھا کہ پاکستان کو چھ دہائیوں پر محیط اقوام متحدہ کے امن مشن میں اپنی دیرینہ اور مسلسل شراکت پر فخر ہے،1960 سے ہمارے 2 لاکھ سے زیادہ مرد اور خواتین نے اقوام متحدہ کے 46 مشنز میں عزت اور بہادری کے ساتھ خدمات انجام دیں۔

عاصم افتخار احمد نے کہا کہ پاکستانی امن دستوں نے ہمیشہ ہر مشن میں جہاں انہوں نے حصہ لیا ہے،اپنی پیشہ ورانہ مہارت اور لگن کے ذریعے خود کو ممتاز کیا ہے۔

انہوں نے یہ بھی کہا کہ ہمارے 169 بہادر امن دستوں نے بین الاقوامی امن اور سلامتی کے مقصد کے لیے فرض کی ادائیگی میں لازوال قربانیاں دی ہیں۔

ترجمان دفتر خارجہ کا کہنا تھا کہ پاکستانی خواتین کے امن دستے بھی تنازعات اور تنازعات کے بعد کے حالات میں مدد فراہم کر رہے ہیں، ہماری خواتین افسروں کی ایک ٹیم اس وقت اقوام متحدہ جمہوریہ کانگوکے امن مشن میںخدمات انجام دے رہی ہے۔

ان کا یہ بھی کہنا تھا کہ جمہوریہ کانگو میں تعینات ہماری خواتین کی ٹیم میں، ڈاکٹر، نرسیں، ماہرین نفسیات، تناؤ کم کرنے والے کونسلر، پیشہ ورانہ تربیت کے افسران، صنفی امور کے ماہرین، لاجسٹکس آفیسرز اورآپریشن افسران شامل ہیں۔

انہوں نے کہا کہ اقوام متحدہ کے کانگو مشن میں ہماری تعیناتیاں پائیدار امن اور سلامتی کے فروغ میں خواتین کے اہم کردار کے لیے پاکستان کی گہری وابستگی کی عکاسی کرتی ہیں۔

عاصم افتخار احمد نے  یہ بھی کہا کہ اقوام متحدہ کے امن مشن میں پاکستان کا تعاون امن کے قیام اور پالیسی کی ترقی میں ہماری مسلسل مصروفیت کی تکمیل کرتا ہے۔

ان کا کہنا تھا کہ پاکستان اقوام متحدہ کے سب سے قدیم فوجی مبصر گروپ برائے انڈیا و پاکستان میں ایک سرکردہ فوجی تعاون کرنے والے ملک کے ساتھ ساتھ ایک میزبان ملک کے طور پر امن قائم کرنے کے لیے ایک منفرد نقطہ نظر پیش کرتا ہے۔

ترجمان دفتر خارجہ عاصم افتخار احمد کا مزید کہنا تھا کہ پاکستان اقوام متحدہ کے زیراہتمام بین الاقوامی امن اور سلامتی کو برقرار رکھنے کے لیے اس کے امن مشن کویقینی بنانے کے لیے اپنے عزم کا اعادہ کرتا ہے۔