حنا ربانی کھر نے کہا ہے کہ وزیر خارجہ کا دورہ امریکہ اہم ہے۔

وزیر مملکت برائے خارجہ امور حنا ربانی کھر نے میڈیا سے گفتگو کرتے ہوئے کہا کہ وزیر خارجہ کا دورہ امریکہ اہم ہے، امریکہ دورے میں دو اہم ملاقاتیں ہیں۔

 انہوں نے کہا کہ ایک گلوبل فوڈ سیکیورٹی پر اور دوسری پیس اینڈ سیکیورٹی کے حوالے سے، بطور خوراک کی کمی کا کار ملک ہمارے لیے گلوبل فوڈ سیکیورٹی اجلاس اہم ہے۔

حنا ربانی کھر کا کہنا تھا کہ وزیر خارجہ ان اہم ملاقاتوں میں پاکستان کا موقف پیش کریں گے جبکہ ہم ایک تنازع شدہ ملک کا ہمسایہ ہونے کے ناطے اپنے تجربات بیان کریں گے۔

وزیر مملکت برائے خارجہ امور کا یہ بھی کہنا تھا کہ ہم بتائیں گے کہ پاکستان کبھی بھی تنازع کا حصہ نہیں بننا چاہتا اور ہم ہر پلیٹ فارم کا استعمال جارحانہ انداز میں کریں گے۔

انہوں نے کہا کہ مقبوضہ جموں و کشمیر میں انسانی حقوق کی خلاف ورزیوں کو موثر انداز میں اجاگر کیا جائے گا۔

حنا ربانی کھر نے یہ بھی کہا کہ وزیرخارجہ کی انٹونی بلنکن سے ملاقات 18 مئی کو ہوگی جبکہ ملاقات پاک امریکہ تعلقات اور ان پر افغانستان کے حالات کے اثرات کے حوالے سے اہم ہے۔

ان کا کہنا تھا کہ پاکستان اور امریکہ کی اعلان شدہ مفادات میں افغانستان کے حوالے سے زیادہ فرق نہیں ہے جبکہ ہم پاکستان کے مفادارٹ کا خیال رکھیں گے۔

حنا ربانی کھر نے کہا کہ جرمن اور اطالوی وفود سے بھی ملاقاتیں ہوں گی ، وزیر خارجہ کے دورہ امریکہ کے بعد چین کا دورہ متوقع ہے۔

وزیر مملکت برائے خارجہ امور حنا ربانی کھر کا مزید کہنا تھا کہ دورہ چین کے بعد وزیر خارجہ ڈیووس جائیں گے وہاں وزیر خارجہ عالمی اقتصادی فورم میں شرکت کریں گے۔